Igande honetan hasiko da sanferminen aurretik berotzen hasteko ekaina Kondestable Civivoxean

Igande honetan hasiko da sanferminen aurretik berotzen hasteko ekaina Kondestable Civivoxean
Hilabetean zehar zentroan hainbat formatutako 12 hitzordu eginen dira, adin guztietarako edukiekin: musika, lantegiak, sukaldaritza, hitzaldiak...
San Fermín

 

Datorren igandean hasiko da Kondestablen ‘San Fermin gertutik’ adin guztietarako jarduera-zikloa, Civivox sarean Iruñeko jaien aurretik berotzeko balio duena. Oraingoan programak 12 hitzordu izanen ditu: haurrendako 4 lantegi eta sukaldaritzako hiru, entzunaldi bat, bi hitzaldi, zineforum bat eta DJ saio bat.

Aldez aurretik izena eman behar da jarduera guztietan, eta hori egin daiteke 010 (948 420 100) herritarrendako informazio telefonoaren bidez, pamplonaescultura.es webgunean zein aurrez aurre Civivox sareko edozein zentrotan. Jarduera batzuk doan dira, eta gainerakoen prezioa 2 eta 4 euro bitartekoa da.

Zikloa igande honetan hasiko da doako matinée batekin: ‘Sarasate sanferminetan’ izenburua duen entzunaldia, nazioartean famatua den musikari eta konpositore iruindarrak bizitzan zehar bere hiriko jaietan egindako saioak gogora ekarriko dituena. Saioa eguerdiko 12:00etan izanen da, eta Beatriz Pomés ikertzaile eta flauta-jotzaileak hura testuinguruan jarri eta, Alicia Griffiths harpa-jotzailearekin batera, Sarasateren musika joko du. Helduendako matinée-ak gutxi gorabehera 40 minutu iraunen ditu, eta konpositorearen omenezko Museo-aretoan izanen da, eraikinaren lehenengo solairuan.

Haurrendako sormen-tailerrak

Haurrendako sormen-lantegiak ekainaren 18, 23 eta 28an izanen dira, askotariko edukiekin. Lehenengoa ‘Erraldoi eta kilikien lantegia’ izanen da, pintatutako oihalez panpinak egiteko, Tea en la Azotea taldearen zaintzapean. 6 eta 12 urte bitarteko haurrei zuzendua; 12 leku ditu eta 11:00etatik 12:30era eginen da. Bigarren lantegia, ‘Sanferminak Legorekin’, ordu berean eginen da, baina ekainaren 23an, euskaraz, eta 29an, gaztelaniaz. Discover Bricks taldearen eskutik, 5 eta 12 urte bitarteko 12 haurrek LEGO piezen bidez sanferminetako eszenak sortzen ahalko dituzte: entzierroaren ibilbidea, barrakak, peñen irteera, Udaletxeko fatxada, su artifizialak...

Haurrendako lantegien azken proposamena ‘Sanferminetako gure filma’ izanen da, ekainaren 28an, 10:30etik 12:30era. 7 eta 12 urte bitarteko adingabeek paperean eszenografia bat eta egituratutako pertsonaiak sortu beharko dituzte, ondoren San Fermini buruzko animazio-film txiki bat filmatzeko. Similarte-ko Mila Garcíak monitorizatuko ditu jarduera horretan parte hartzen duten adingabeak. Lantegi guztiek 2 euro balio dute, leku bakoitzeko.

Sanferminetako sukaldaritza

Sukaldaritzako ikasgelak ere lekua izanen du ‘San Fermin gertutik’ programan. Edizio honetan proposamenak galletei, kazolatxoei eta askariei eskainitako hiru saio izanen ditu, ekainaren 21ean, 23an eta 28an, hurrenez hurren. Lehenengo saioa, ‘Sanferminetako galletak’, familiendako izanen da, eta 14 leku izanen ditu (zazpi heldu eta 6 eta 10 urte bitarteko zazpi adingabe). Orea egin, sanferminetako galletei forma eman eta koloreekin dekoratuko dira. Jarduera Sonia Carrascoren eskutik izanen da; 4 euro balio ditu, eta 17:00etatik 19:00etara eginen da.

Hurrengo saioak Fátima Díasek emanen ditu. Ekainaren 23an, 10:00etatik 12:30era, ‘Sanferminetako kazolatxoak’ saioan errezeta tradizionalak jorratuko dira, hala nola zezen erregosia, ajoarrieroa eta arkumea txilindronean. 15 leku daude, 2 euroan, ekainaren 28ko sukaldaritza-lantegiaren baldintza berberetan. Jaia energiaz jarraitu nahi dutenei zuzenduta, sukaldean ‘Sanferminetako askari’ klasikoak eta ez hain klasikoak aztertuko dira. Saioa 18:30etik 21:00etara izanen da.

Zinema, hitzaldiak eta, amaitzeko, DJa

Ekainaren 20an, zazpigarren artea maite dutenek hitzordu bat izanen dute ‘Sanferminak zineman’ saioarekin, Iñaki Arrubla kritikariaren eskutik. 19:00etan izanen da, doan, eta aldez aurretik izena eman behar. Saioan zeluloideko sanferminetako eszenak aztertuko dira, eta ibilbide bat eginen da honako film hauek berraurkitzeko: Fiesta! (1956), Un rincón para querernos (1964), Don Quixote (1992) eta berriago batzuk, hala nola Knight and Day (2010), Encierro-3D (2013) eta Blue Lips (2014).

Ekainaren 21ean (asteartea) eta 22an (asteazkena) bi hitzaldi proposatzen dira. Alde batetik, Ana Ulargui Historian doktoreak ‘Sanferminak irudietan: XIX. mendetik XXI.era’ hitzaldian (19:00), irudi bitxien bidez, jaien bilakaera irudikatzen duen ibilbide historiko eta kronologiko bat aztertuko du; beste aldetik, hurrengo egunean, Aitziber Imizcoz Giza Zientzietan lizentziadunak gauza bera eginen du euskaraz, jaiaren argazkien eta kartelen bidez (19:00). Bi hitzaldiak doan dira, eta aldez aurretik izena eman behar da.

Civivox sareko sanfermin aurreko ziklo hori amaitzeko, ekainaren 30ean, 19:00etan, DJ-saio bat eginen da Oswald Tanco nafartarraren eskutik, zeinak musika panoraman bestelako irrati-ekimen interesgarrienetako bat zuzentzen baitu: Maiztasun-radarra. Irrati-dokumentazioaren eta soinu-proposamenaren nahasketa horretan, Oswald sanferminetako musika-panoraman murgilduko da, jaietan gertatu ziren kontzertu interesgarrienen adibideak jarriz, eta 2022ko musikarik interesgarriena aukeratuz eta jarriz.

 ‘2022ko San Fermin gertutik’. Kondestable Civivoxean ekainean

Ekainak 5, igandea

  • Sarasate sanferminetan

MATINÉE ENTZUNALDIA

  • Beatriz Pomés, ikertzaile eta flauta-jotzailea; Alicia Griffiths, harpa-jotzailea.
  • 12:00. 25 leku. Doan. Aldez aurretik izena eman behar da.

Ekainak 18, larunbata

  • Erraldoiak eta kilikiak

LANTEGIA

  • Tea en la azotea
  • 11:00etik 12:30era. 6-12 urte bitarte. 12 leku. 2 €. Aldez aurretik izena eman behar da.

Ekainak 20, astelehena

  • Sanferminak, zineman

ZINEFORUMA

  • Iñaki Arrubla, zinema kritikaria.
  • 19:00. Doan. Aldez aurretik izena eman behar da.

Ekainak 21, asteartea

  • Sanferminetako galletak

SUKALDARITZA LANTEGIA (familiendako)

  • Sonia Carrasco
  • 17:00etatik 19:00etara. 14 leku (7 adingabe + 7 heldu), 6 eta 10 urte bitarte, heldu batez lagundurik. 4 €. Aldez aurretik izena eman behar da.
  • Sanferminak irudietan: XIX. mendetik XXI.era

HITZALDIA

  • Ana Ulargui, Historian doktorea
  • 19:00. Doan. Aldez aurretik izena eman behar da.

Ekainak 22, asteazkena

  • Sanferminetako historia: argazkiak, kartelak eta efemerideak

HITZALDIA (euskaraz)

  • Aitziber Imizcoz, Giza Zientzietan lizentziaduna
  • 19:00. Doan. Aldez aurretik izena eman behar da.

Ekainak 23, osteguna

  • Sanferminetako kazolatxoak

SUKALDARITZA-LANTEGIA

  • Fátima Dias
  • 10:00etatik 12:30era. 15 leku, 2 €. Aldez aurretik izena eman behar da.
  • Sanferminak Legorekin

HAURRENDAKO SORMEN-LANTEGIA (euskaraz)

  • Discover Bricks
  • 11:00etatik 12:30era. 5-12 urte bitarte. 12 leku. 2 €. Aldez aurretik izena eman behar da.

Ekainak 28, asteartea

  • Sanferminetako gure filma

HAURRENDAKO SORMEN-LANTEGIA

  • Mila García. Similarte
  • 10:30etik 12:30era. 7-12 urte bitarte. 12 leku. 2 €. Aldez aurretik izena eman behar da.
  • Peñen askariak

SUKALDARITZA-LANTEGIA

  • Fátima Dias
  • 18:30etik 21:00etara. 15 leku. 2 €. Aldez aurretik izena eman behar da

Ekainak 29, asteazkena

  • Sanferminak Legorekin

HAURRENDAKO SORMEN-LANTEGIA

  • Discover Bricks

•           11:00etatik 12:30era. 5-12 urte bitarte. 12 leku. 2 €. Aldez aurretik izena eman behar da

Ekainak 30, osteguna

  • Maiztasun-radarra: Sanferminetako musika

DJ SAIOA

  • Oswald Tanco
  • 19:00. Doan, aurretik izena emanda
¿Te ha sido útil esta página?