39.400 erabiltzailek nabigatu zuten Gaztediaren Etxeko proposamenetan 2020an, eta haren bideoek 24.000 ikustaldi baino gehiago izan zituzten

39.400 erabiltzailek nabigatu zuten Gaztediaren Etxeko proposamenetan 2020an, eta haren bideoek 24.000 ikustaldi baino gehiago izan zituzten
Ekainaz geroztik aurrez aurre berriz irekita, gaur egun zerbitzu guztiak abian dira, eta COVID-19aren kontrako segurtasun-neurriei egokituta

 

Gaztediaren Etxeak 2021. urteari hasiera eman dio neguko programazioa abian dela eta zerbitzu guztiak irekita dituela. Ahalegin hori joan den ekainean hasi zen, bere jarduerak eta sarbide-sistemak, ibilbideak eta espazioak COVID-19aren aurkako osasun-segurtasuneko arauetara egokitu baitzituen. Gaur, hiriko gazteentzat erreferente izan nahi duen zentro hau astelehenetik igandera zabalik dago, baina, etxeratze-aginduari egokitzeko, arratsaldeetan, astelehenetik ostiralera, ordutegia 60 minutu aurreratu da: 17:00etatik 22:00etara ireki beharrean, 16:00etatik 21:00etara dago zabalik. Dagoeneko ezarrita dauden osasun-segurtasuneko neurriez gain, 11 aire-garbigailu jarri dira ekitaldi-aretoan, musika-entseguetarako aretoetan eta Gazteendako Informazio Bulegoan, bertan ez baitago aireztapen naturalik.

Hilabete hauetan guztietan ikastaroen programazioa izan da bertan behera geratu den bakarra (neguan eta udaberrian, konfinamenduagatik, eta udazkenean, edukiera mugatuagatik). Etxeak lanean jarraitu du joan den martxotik; izan ere, hiriko gazteentzako erreferente horrek, konfinamenduan zehar, bere baliabide materialak eta pertsonalak jarri ditu gizarte-premia orokorren, gazte-elkarteen eta erabiltzaile partikularren eskarien zerbitzura. Erabakiak aurrez aurreko harremana online sistemara migratzea eskatzen zuen: informazioa birmoldatzea, irakaskuntzari laguntzea, lan-eskaintzak edo bekak eskuratzea.

Etxearen ekimenak eraldatu egin ziren, baina baliabideak zentroan jada eskuragarri zeudenak ziren; hala, 2020an Iruñeko Udalak gaur egun Gaztediaren Etxean dituen baliabide propioen baliozkotasuna eta erabilgarritasuna probatu dira, eta egiaztatu da erakundeak 14 eta 30 urte bitarteko adin-tartearekin komunikatzeko erabilitako hizkuntzak egokiak direla. Joan den urteko balantzeak honako datu hauek uzten ditu: internauten ia 37.000 bisita, 24.000 bideo-ikustaldi baino gehiago eta 20.502 erabiltzaile sare sozialetan (Twitter, Facebook eta Instagram); horietatik 1.928 jarraitzaile berriak dira.

Ia 39.400 bisita birtual

Pandemiaren aurkako borrokaren hasierako uneetan, Etxeak 3D-Maker delakoei laguntza eman zien pantaila-babesleetarako diademak eta "non-touch" gailuak inprimatzeko osasun-langileentzat eta gizarte-zerbitzuetako langileentzat. Gainera, teknologiak egoera horretan eta, zehazki, online ikaskuntza-prozesuan duen garrantziaz jabetuta, Gaztediaren Etxeak "Capitán ReseTic" ekimena abiatu zuen. Bertan, Zibergelako arduradunak aholkuak ematen zizkien laguntza behar zutenei, posta elektronikoz, programak instalatzeko, bideodeien aplikazioak erabiltzeko, online lanak egiteko eta partekatzeko, ofimatika, Office edo Interneti buruzko kontsultak argituz.

Gazteak eta haien elkarteak informatuta mantentzeko ahaleginari eustea ere erronka izan zen hasieratik, haien interesetara eta komunikazio-moduetara egokituta. Hala, aholkularitza espezializatuek infografia informatiboak sortu zituzten sareetarako gaurkotasuneko gaiei buruz (autonomoentzako laguntza-neurriak, dirulaguntzei buruzko berritasunak, salbuespenezko neurriak etxebizitzaren, osasunaren eta ikasketen arloan...), eta, zehazki, Elkartegintzarako Aholkularitzak ‘Etorkizunera itzuli’ gida digitala prestatu zuen gazte-elkarteei laguntzeko egoera berrian eta beren elkarte-lanaren legezko baldintzetan. Gida astero eguneratzen zen, bai konfinamenduan, bai deseskalatzearen faseetan, eta guztira 2.417 bisita izan ditu.

Bien bitartean, Gaztediaren Etxeak bere urteko lanean oso garrantzitsua baliabidea mantentzen zuen: Gazteendako Informazio Bulegoa, zeina leihatila birtual bihurtu baitzen140 jarduera, lan, lehiaketa, boluntariotza eta prestakuntza eskaintzarekin. Bertara 36.943 internautek jo zuten.

Bideo bidezko komunikazioa: 24.108 ikustaldi

Distantzia fisikoa nahitaez mantendu beharreko egoera horretan, Gaztediaren Etxeak hiriko gazteei zuzendutako bideoak ekoiztearen aldeko apustua egin zuen. Informazio-eduki erabilgarriak zabaldu ditu ‘Ogi-txigortuen’ bidez: 29 informazio-mokadu, @PamplonaGaztea eta @IrunaGaztea Facebookeko orrien bidez zabaldu direnak, baita Iruñeko Udalaren Youtubeko kanalaren bidez ere. Guztira, ‘Ogi-txigortuek’ 5.148 ikustaldi izan zituzten. Ikusienak gidabaimena (991) eta NANa (444) berritzekoak izan dira. Beste gai batzuk ere jorratu ziren: ‘Berrogeialdian ikasi’, ‘Liburutegiko txartel birtuala lortu’, etab.

Eta urrutiko aisialdirako proposamenak egin ziren. Etxeko teknikariek –diziplina desberdinetako begiraleek– zein beren instalazioetara jarduerak egitera joaten diren pertsonek edo taldeek edo erabiltzaile ohiek "Etxetik... zure etxera!" ikus-entzunezko atalean parte hartu zuten: 33 bideotutorial, 9 erronka eta 24 animo-agur, Iruña Gaztearen sareetan eskegi eta ia 19.000 ikustaldi lortu zituztenak. Baxuak hartzetik hasi eta galtzak berrasmatzeraino, asko izan ziren proposamenak. Honako hauek ikusienak: trapilloa egitea (825), gela ordenatzea (811) eta lisatzea (608).

Lan-planteamendu horrekin, Gazteriaren sare sozialek 20.455 erabiltzailerekin amaitu dute urtea Twitter, Facebook eta Instagrameko kanaletan. Horietatik 1.928 jarraitzaile berriak dira, 2020an alta eman dutenak. Ia % 10ko igoera hori modu ez proportzionalean banatzen da. Instagramen, adibidez, erabiltzaileen kopurua % 70 igo da, eta Twitterren, % 11,6.

¿Te ha sido útil esta página?