Zinema-gauak programa datorren astean amaituko da, espazio publikoan emanen diren azken bost zinema-saioekin. Programak lanegunetan, gauero, 22:00etan, doako proiekzioak eskaintzen ditu, jatorriak, errodaje-datak, bikoizketa-hizkuntzak, generoak eta abar txandakatuz. Aurreko astean bezala, pantaila Alde Zaharrean, Txantrean, Iturraman, Milagrosa-Arrosadian eta Arrotxapean egonen da.
Asteari hasiera emateko, familia-giroko komedia bat eta helduendako animaziozko film bat proiektatuko dira. Abuztuaren 25ean, astelehena, Alde Zaharreko San Frantzisko plazan Aita bizitza (Espainia, 2022, 87’) filma proiektatuko da, euskaraz: duela hogeita hamar urte desagertutako aitaren ustekabeko bisita jasoko duen Mikel chef gazte eta handinahiari buruzkoa. Joaquín Mazón da zuzendaria, Karra Elejalde eta Enric Auquer, besteak beste, aktoreak eta Joaquín Oristrell, gidoilaria.
Asteartean Txantreako Arriurdiñeta plazaren txanda izanen da, bertan Pablo Berger zuzendari eta gidoilariaren beste film espainiar bat ikusteko aukera izanen da: Robot dreams (Espainia, 2023, 102’), zeinak estreinatu zen urtean sari mordoa jaso baitzuen. Sara Varonen eleberri grafiko batean oinarritutako animaziozko filma da. Bi protagonista ditu: Dog, Manhattanen bizi den txakur bakartia, eta bakarrik ez egoteko txakurrak eraiki duen lagun robotikoa. Agertokia: 80ko hamarkadako New York. Bergerren filmak hainbat animazio- eta gidoi-sari jaso zituen honako ekitaldi hauetan, besteak beste: Goya sariak, Gaudí sariak, Feroz sariak, Forqué sariak, EFA Europako Zinemaren sariak eta Zinema Iberoamerikarreko Platino sariak.
Zinema-gauak 2025. 22:00etan
ALDE ZAHARRA
San Frantzisko plaza
Abuztuak 25: Aita bizitza (Espainia, 2022, 87’). Euskaraz
TXANTREA
Arriurdiñeta plazan
Abuztuak 26: Robot Dreams (Espainia, 2023, 102’).
ITURRAMA
Iturramako bulebarra
Abuztuak 27: Los Goonies (Goonietarrak) (AEB, 1985, 111’)
MILAGROSA-ARROSADIA
Alfredo Floristán plazan
Abuztuak 28: Odio el verano (Uda gorroto dut) (Espainia, 2024, 103’)
ARROTXAPEA
Maiteminduen parkean
Abuztuak 29: Garfield. La Película (Garfield. Filma)