Iruñeko Udalak eta Navarra Music Commissionek bultzatutako Kuxkuxean zikloaren barruan, lehen kontzertua eginen da larunbatean, Nafarroako artista eta musika-talde hasiberriak sustatzeko. Musika-lanak aurkezteko gune bat izateaz gain, ikus-entzuleek soinu berriak ezagutzeko aukera dute. Iaz sortutako zikloaren bigarren edizioaren barruan, 2025eko urritik 2026ko otsailera bitarte hamar kontzertu eskainiko dira bi agertoki hauetan: Zentraleko 2. aretoan eta Atarrabiako Totem-eko areto nagusian.
Bost hitzordu daude urrian: 4an (larunbata) Bisai musika-taldearen txanda izanen da; 10ean, Pingo Potens taldeak Zentralen joko du; 11n, Edu Zardoyak Totem aretoan eta Fría Janek Zentralen, eta 25ean, Hartzak Zeruan bikotearen txanda Zentralen. Azaroan, berriz, 8an, The Blackening musika-taldeak joko du Totem-eko areto nagusian; 14an, Gorputzaren Argiak, Zentralen, eta 15ean, Lamina Romak, Tótem aretoan. 2026an bukatuko da Kuxkuxean zikloa, Zentraleko 2. aretoan antolatu diren bi proposamen hauekin: Jumelage urtarrilaren 24an eta Ajou! otsailaren 14an.
Navarra Music Commissionek bultzatutako deialdi baten bidez hautatu dira Kuxkuxean zikloko artista eta talde parte-hartzaileak, eta guztira 125 proposamen jaso ziren: 61 Totem aretoan jotzeko, eta 64, Zentralen. Musika-bulegoak eta Iruñeko Udalak osatutako epaimahai batek hautatu zituen hamar finalistak. Taldeak eta artistak hautatzeko irizpide hauek hartu zituzten aintzat: abestiak duela gutxi argitaratu izana, gutxienez 60 minutuko errepertorioa izatea, eta bereziki garrantzia eman zitzaien euskarazko eta emakumeak buru dituzten musika-proposamenei.
Bigarrenez antolatu da zikloa, Nafarroako Gobernuaren eta Iruñeko Udalaren akordioaren esparruan, Navarra Music Comissionen bidez. Lankidetza horren parte dira, halaber, egitasmo hauek: sanferminetan Compañía plazan kontzertuak egiteko deialdia eta Musika-aretoak kalean zikloaren barruan Nafarroan egiten diren kontzertuak.
KUXKUXEAN 2025-2026
• 2025eko urria
o Bisai: Urriak 4, larunbata (Totem)
o Pingo Potens: urriak 10, ostirala (Zentral)
o Edu Zardoya: urriak 11, larunbata (Totem)
o Fría Jane: urriak 11, larunbata (Zentral)
o Hartzak Zeruan: urriak 25, larunbata (Zentral)
• 2025eko azaroa
o The Blackening: azaroak 8, larunbata (Totem)
o Gorputzaren Argia: azaroak 14, ostirala (Zentral)
o Lamina Roma: azaroak 15, larunbata (Totem)
• 2026ko urtarrila
o Jumelage: urtarrilak 24, larunbata (Zentral)
• 2026ko otsaila
o Ajou!: otsailak 14, larunbata (Zentral)