Udalaren ibilketa nordikoak berriro eginen dira, irailetik azarora, bi intentsitate mailatan, eta ibilbidetan Biurdana eta Ziudadela gehitu dira

Iruñeko Udalak hirian barnako ibilketa nordikoaren saioen eskaintzari jarraipena eman dio, aire zabalean ariketa fisikoa egitea bultzatzeko. Irailaren 11tik azaroaren 16ra, asteazkenetan eta larunbatetan izanen dira saioak, eta oraingoan hirian barnako ibilbide berri hauetan ere: Biurdana eta Ziudadela. Horiek Taconera parkeari, Arantzadiko inguruneari eta Donejakue Bideko tarteei gehituko zaizkie. Ohi denez, asteazkenetako ibilketak samurragoak izanen dira, adinekoendako edo hasiberriendako modukoak; eta larunbatetan, gogorragoak, jarduera fisiko biziagoa egiten ahal dutenentzat.

Interesdunek bihartik ematen ahal dute izena, irailaren 5etik, 010 edo 948420100 Herritarrendako Arreta telefonoetara deituta. Izena eman dutenei ibilketa nordikorako makilak utziko zaizkie. Parte-hartzaile bakoitzak nahi dituen saioetan eman dezake izena, 3 euro ordaindu beharko ditu asteazkenetako saio bakoitzeko, eta 4 euro, larunbatetako saio bakoitzeko. Taldeko 30 toki daude, izena eman den hurrenkeran esleituko direnak, eta ordainketa izena ematean eginen da, banku-txartelaz.

Aurreko udaberrian 562 toki eskaini ziren martxotik maiatzera egindako martxetan, eskainitako toki guztiak beteta. Orain dela 12 urte hasi zen Udala jarduera hau eskaintzen; Civivox sarearekin eta hiriko auzo batzuetako osasun-etxeekin elkarlanean eginik. Pasealdi guztiak begirale adituek gidatzen dituzte, aurretik ibilketa-mota honi dagozkion beroketa-ariketak eta azalpen teknikoa eginez.

Ibilbideak: bi ibilbide berri eta bi intentsitate
Edizio honetan hiriko Taconera parkeko, Arantzadiko inguruneko eta Donejakue Bideko tarteetako ibilbideak mantendu dira. Halere, programari eskaintza berriak gehitu zaizkio: bata, Biurdanako ibilbidea; eta bestea, gune harresidunei eta Ziudadelari lotua.

Udazkeneko edizio honetan bi ibilketa-motako planteamendua mantentzen da. Asteazkenetakoak hastapen-mailakoak izanen dira ordu eta erdiko iraupenaz, 12:00etatik 13:30era; eta larunbatekoak, jarduera bizikoak, 09:30ean hasi eta 13:00etan amaituko dira. Asteazkenetako saioetako parte-hartzaileen topalekua Burgoen plaza izanen da, Udaletxearen ondoan; larunbatetan hiriko auzoetako Civivoxetako bat izanen da abiapuntua.

Saio bakoitzean gehienez 30 lagunek osatutako talde bat bilduko da, Yolanda Urdiain eta Carlos Alberto kirol-begiraleen gidaritzapean, udaberriko saioak ere zuzendu zituztelarik. Saio bakoitzaren hasieran, kirol honek osasunerako dituen abantailak aipatuko dira, eta ibilketa nordikoko makilen teknika, ongi erabiltzen, irakatsiko da. Ibilketa hasi aurretik beroketa-ariketak eginen dira minutu batzuez, eta amaitutakoan, luzatze-ariketak.

Ibilketa nordikoa aire zabalean egiten den ariketa fisikoko modalitatea da, oso teknika xumea duena. Bi makilaren laguntzaz ibiltzea da ibilketa nordikoaren oinarria, makilek ibilketaren abiada erraztu egiten baitute. Kirol honek ohiko ibilketak baino abantaila gehiago ditu: makilekin muskulu-multzo gehiago mugitzen dira, bizkarrak eta aldaka zein belaunetako artikulazioek jasaten duten zama arintzen du, bihotz-biriketako errendimendua handitzen du, eta sortzen duen neke sentsazioa txikia da.

IBILKETA NORDIKOAK

Asteazkenetan (neurrizko jarduera fisikoa)

• Ibilbideak: Taconera parkea, Arantzadiko ingurunea, Biurdana parkea, Donejakue Bidea eta Ziudadela
• Ordutegia: 12:00 – 13:30
• Topalekua: Burgoen plaza

Larunbatetan (jarduera fisiko bizia)

• Ibilbideak
• Ordutegia: 09:30 – 13:00
• Topalekuak: Civivox sareko zentroak.