Urtarrilaren 10era arte dago ikusgai Sahel eskualdeko emakumeak erakusketa Kondestable Civivoxeko erakusketa-aretoan: Juan Luis Rod eta José Naranjoren argazki-bilduma bat da, eta emakume aktibistak, artistak, ikasleak eta liderrak islatzen ditu. Gatazkek eta pobreziak markatutako eskualde afrikar horretan, emakume horiek erreferenteak dira beren komunitateetan. Afrika behar-beharrezkoa gizarte-sentsibilizaziorako kultur zikloa da, eta horren barruan antolatu da gaur goizean aurkeztutako erakusketa. Honako hauek izan dira aurkezpenean: Maider Beloki Unzu, Kulturako, Jaietako eta Kiroleko zinegotzia; eta Miriam Martón Pérez, Nafarroako Gobernuaren Gizarte Babeserako eta Garapenaren aldeko Lankidetzarako zuzendari nagusia. Horiekin batera, Afrika behar-beharrezkoa zikloko Sara Aldaba eta Nafar Ateneoko María Ibáñez izan dira, baita egileak ere. Hain zuzen ere, bi egileek aurkezpena eta bisita gidatu bat eginen dute 19:00etan. Urtarrilaren 10era arte egonen da ikusgai erakusketa.
65 argazki biltzen ditu erakusketak, baita mapa bat, ikus-entzunezko pieza bat eta hainbat azalpen-testu ere, eta 2019an hasitako ibilbidea dute abiapuntu. Honako hauek izan dira ibilbide horren protagonistak: batetik, Juan Luis Rod fotokazetaria, El País, The Guardian eta Deutsche Welle egunkarietan ohiko laguntzailea; bestetik, José Naranjo kazetaria. Naranjo Senegalen bizi da, eta Sahel eskualdeko hainbat herrialdetan egon da lanean, besteak beste, Burkina Fason, Malin, Nigerren, Mauritanian eta Senegalen. Argazkien bidez, asmoa da beren hurbileko komunitateetan eta herrialde horietako gizartean erreferente diren emakumeen istorioak kontatzea. Izan ere, muturreko pobrezia, bidegabekeria eta zaurgarritasuna dira nagusi herrialde horietan, eta, gainera, gogor pairatzen dute klima-aldaketaren eragina. Ezegonkortasuna eta aukera-falta dira protagonistak testuinguru horretan, eta, horregatik guztiagatik, Sahel eskualdeko emakumeek funtsezko eginkizuna betetzen dute. Aktibismo hori nazioartera ere zabaldu da, eta hauxe baino ez dute eskatzen emakumeek: eskubide-berdintasuna, hezkuntzara sarbidea izatea eta emakumeek etorkizun bidezko eta jasangarriagoa eraikitzen betetzen duten eginkizuna aitortzea.
Zikloa guztiz finkatuta dago
Saharaz hegoaldean, Afrika behar-beharrezkoa zikloaren 26. edizioa dugu aurtengoa: urriaren 21etik abenduaren 22ra egiten ari da Iruñean, Burlatan eta Tuteran, eta emakume afrikarrak dira protagonistak. Nafarroako irabazi-asmorik gabeko zazpi erakunde hauek antolatu dute zikloa: Felipe Rinaldi fundazioa, Medicus Mundi, Ojos del Mundo, Oxfam Intermón, Proclade Yanapay, SED (Elkartasuna/Hezkuntza/Garapena) eta TAU Fundazioa. Iruñeko Udalak eta Nafarroako Gobernuak finantzatu dute egitasmoa, baita Felipe Rinaldi fundazioak ere. Erakusketaz gain, programak ekitaldi hauek barne hartzen ditu: dantza-lantegiak, literatur topaketak, elkarrizketak, proiekzioak eta beste kultur jarduera batzuk.
AFRIKA BEHAR-BEHARREZKOA: SAHEL ESKUALDEKO EMAKUMEAK
• Kondestablearen jauregiko erakusketa-aretoa
o Datak: 2026ko azaroaren 5etik 2027ko urtarrilaren 10era
o Ordutegia: astelehenetik igandera, 09:00etatik 14:00etara eta 17:00etatik 21:00etara
• Jarduera osagarria
o Azaroak 5, osteguna. 19:00: Aurkezpena eta bisita gidatua Juan Luis Rod eta José Naranjo erakusketaren egileen eskutik