Iruñeko Udalak antolatutako Gazteendako XXXI. Literatura Lehiaketako 34 lan irabazleak irakur daitezke jada www.letrajoven.com eta www.letragaztea.com webguneen bitartez. Narratiba zein poesia modalitateetako testu irabazleak hedatu eta sustatzeko modu bat, gaztelaniaz zein euskaraz, hurrenez hurren, 14 eta 18 urte bitarteko gazteek idatziak.
Bi webguneak gazteen literatura-lanen gordailu gisa funtzionatzen dute eta bertan aurreko bi edizioetako (2020 eta 2019) lehiaketetan saritutako lanak ere biltzen dira. Lanak inprimatu eta deskargatzeko aukera dago, norbaitek erabili nahi izanez gero, ikasgeletan, adibidez. Creative Commos lizentziapean argitaratuta daude eta horrek lana erabiltzeko aukera ematen du, betiere egiletza aitortzen bada, merkaturatzen ez bada eta lan horretatik bestelako lanik eratortzen ez bada. Webgunearen edizioaz eta diseinuaz Ciganda+Koch Comunicación enpresa arduratu da.
Gazteendako Literatura Lehiaketaren azken edizio honetan 247 lan aurkeztu ziren, aurreko urtean baino % 106 gehiago, zeina COVID-19ren pandemiaren ondoriozko mugek eta konfinamenduak markatuta egon baitzen. Gaztelaniazko 209 lan eta euskarazko 38 aurkeztu ziren, poesiaren aldean (% 30,3) kontakizun laburra hobetsiz (% 69,6). Lehiaketa bi adin-tartetan antolatzen da: 14 eta 16 urte bitartekoak (aurkeztutako testuen % 69,6) eta 17 eta 18 urte bitartekoak ( % 30,3).