‘Gabon hauetan, Iruña oparitu’ da Udalak bultzatutako kanpaina berriaren leloa, tokiko negozioak laguntzeko eta gogorarazteko hiriko establezimenduetan egindako erosketekin Iruña hobeagoa oparituko diogula gure buruari, merkataritza sendoagoarekin, kale biziagoekin eta jendearendako enpleguarekin. Azken batean, inguru hurbilean aberastasun ekonomiko eta gogoaren aberastasun handiagoa lortzea, zerbitzu zuzena emanez eta maskararen atzean irribarrea eskainiz, eta aldi berean hiriarekiko harrotasuna eta horren parte izatearen sentsazioa nabarmenduz.
Horrela, lanean jarraitu nahi da PamplonUp bonuen ildo beretik, 185.000 unitate saldu baitziren, pertsona askok tokiko saltokietan egindako erosketak handitzea eta establezimendu berriak ezagutzea lortuz. Udalak 1,3 milioi euroko ekarpena egin du eta ekimen horrek 5 milioi euro baino gehiago mugitu ditu hiriko saltokietan egindako erosketetan.
Komunikazio-kanpaina eta 6.600 kg opari-paper ematea saltokiei
‘Gabon hauetan, Iruña oparitu’ bi lan-ildotan oinarritzen da nagusiki. Alde batetik, herritarrekiko komunikazioa eta horien sentsibilizazioa, euskarri askotarikoen bidez; eta bestetik, aste horietan saltokiei erabiliko duten opari-papera emanen zaie, honakoa bezalako urte batean aparteko gastu hori egin ez dezaten. 825 opari-paper bobina izanen dira, osotara 6.600 kilo. Poltsa berrerabilgarriak ere emanen zaizkie. Halaber, Udalak argazki-lehiaketa bat antolatu du webgunearen bidez, kanpainaren paperarekin bildutako oparirik originalenak saritzeko.
Gaur Gazteluko plazan aurkeztutako kanpaina egungo osasun krisia kontuan hartuta diseinatu da; izan ere, krisi horrek ez du aukerarik ematen aurreko urteetan bezalako programak egiteko, horietan aurrez aurreko jarduerak nagusitzen baitziren. Aurkezpenean parte hartu dute Iruñeko alkate Enrique Mayak, eta , Nafarroako Merkatarien elkarteko gerente Inma Elcanok, Udalarekin batera ekimena landu duten merkatarien elkarteen ordezkari gisa.
Bertan izan dira ere, Alde Zaharra elkarteko gerentea, Carlos Albillo; Zabalguneko Merkatarien Elkarteko teknikaria, Sara Garaicoechea; Iturrama eta Arrotxapeko elkarteen teknikaria, Mikel Cabestrero; Txantreako elkarteko gerentea, Iñigo Martínez; Zabalguneko eta Ermitagañako Merkatuetako ordezkariak, Diego Cantero eta Elena Ustarroz; Donibane, Ermitagaña eta Mendebaldeako elkarteko teknikaria, Pilar Chozas, eta Sanduzelaiko elkarteko ordezkari bat. Kanpainan ere lagundu dute Mendillorriko elkarteak, San Domingoko Merkatuak eta Denda Txikian Elkarteak.
Iturriak, Foruen estatua eta Gazteluko plazako kioskoa, Gabonetako pinuen artean
Kanpainak hondo gorri bat du oinarri, eta haren gainean, Gabonetako pieza tipiko bat, pinua, eta hiriko elementu ezagunak batzen dira, hala nola iturriak, Gazteluko plazako kioskoa edo Sarasate pasealekuko Foruen estatua. Udalak 825 opari-paper bobina ekoiztu eta banatu ditu. Horrekin batera, Gabonetako 25.000 poltsa berrerabilgarri banatuko dira.
Banaketan kanpainarekin bat egin duten saltokiek izanen dute lehentasuna, hirian aktibo dauden 10 merkatari-elkarteetako bateko kide diren 600 negozio inguruk. Gainera, Iruñeko Udalak kartoizko seinale tolesgarriak eta banderatxoak egin ditu saltokien barruan jartzeko, eta hiriko 600 puntutan ere instalatuko dira, tokiko saltokietan erostea zein garrantzitsua den gogorarazteko.
Halaber, iragarkiak jarriko dira hedabideetan (idatzizko zein formatu digitaleko prentsan, irratian eta telebistan) eta sare sozialetan, eta zenbait aparkalekutako sarbideak eta mupiak (kartelak jartzeko espaloietan dauden euskarri handiak) erabiliko dira. Hedapen handiagoa emateko, apainketa-elementuak jarriko dira, hala nola opari-paperaz bildutako 10 poltsa erraldoi, zeinak auzoetatik eta Iruñeko erdigunetik banatuko baitira. Honako toki hauetan paratuko dira: Arrotxapea (Maiteminduen parkea), Iturrama (López frontoiaren atzealdea), Mendillorri (Egulbati Jaurerriaren kalea), Martín Azpilcueta ( Baionako etorbidearen ondoan), Txantrea (Atarrabiako etorbidea eta San Kristobal kaleen artean), Donibane-Ermitagaña-Mendebaldea (Tramontanaren estatua), Sanduzelai (Sanduzelaiko etorbidea, 77), Alde Zaharra (Gazteluko plaza), I. Zabalgunea (Sarasate pasealekua) eta II. Zabalgunea (Karlos III.aren etorbidea, San Fermin eta Tafalla kaleen artean).
Bildutako oparirik originalenen lehiaketa webgunean
Iruñeko Udalak lehiaketa bat antolatu du Iruña oparitu kanpainaren inguruan. Parte hartu nahi dutenek kanpainako paperaz bildutako objektu edo elementuen argazkiak bidali behar dituzte. Bidalketa http://www.pamplona.es/regalapamplona webgunearen bidez eginen da, non atal bat gaituko baita atariko lau nabarmenduen artean. Argazkiak bidali direla egiaztatzeko, programak oinarriak onartzeko exijitzen du, eta argazkia igo duen pertsonaren izena eta kontaktua adieraztea. Argazkiak ezin izanen dira bi mega baino handiagoak izan, eta banaka igo beharko dira, pertsona bakar batek nahi beste argazki igotzeko mugarik ez dagoen arren.
Bidali ondoren, eskakizunak betetzeko, Udaleko sare sozialetan partekatu behar da, #regalaPamplona eta #oparituIruña hashtagak erabiliz. Argazkiak bidaltzeko epea urtarrilaren 8an amaituko da. Epaimahaiak aukeratuko ditu 3 originalenak, eta bakoitzak txartel bat jasoko du sari moduan, Erresumako Jatetxeen Elkarteko jatetxeetan bi bazkari edo afari egiteko. Halaber, irabazleak Udaletxeko fatxadaren irudi bat jasoko du. Sariak urtarrilean banatuko dira. Webguneak ere aukera ematen du opari-papera deskargatzeko, Iruña Oparitu eta Gabonetako postalen motiboekin.
Horrela, Iruñeko Udalak dagoeneko islatu duen tokiko saltokiei emandako bultzada eta babesa osatzen du, Gabonetako altuerako argiei emandako aurrekontua handitu eta saltokien ateetan elementu desberdinak jarri eta Gazteluko plazan ohikoa den Eguberrietako Azoka instalatu baititu.