Euskarazko hiru dokumentalek osatzen dute urteko lehen hiruhilekorako kultur programazioa, eta Iruñeko Udalak eta Nafar Ateneoak batera prestatu dute. Asteartean Eraman zutela dokumentala ikusten ahalko da: Deñe García-Bravo eta Mikel Balerdik zuzendua, memoria historikoa jorratzen du. Kondestablen proiektatuko da, 19:30ean hasita, eta sarrera librea da.
Marcelo Lasa Zeberioren istorioa kontatzen du: Olaberriakoa (Gipuzkoa) zen, eta 17 urte zituela, 1936ko abuztuaren 25ean hil zuten Lizarrustiko mendatean, Nafarroaren eta Gipuzkoaren arteko mugan. Garai hartan, Eraman zutela esaten zuten herritarrek, baina ez zekiten nork, non eta zergatik eraman zuten. Orain, berriz, Olaberriarrek bilatu dituzte erantzunak. Marceloren ilobak abiatutako ikerketari eta Patxi Lacunzaren testigantzari esker, Arantzadi Zientzia Elkarteak Marcelo ehortzita zegoen lekua aurkitu zuen.
Dokumentalaren zuzendariek, Deñe García Bravok eta Mikel Balerdi Arruabarrenak hain zuzen, ikus-entzunezko komunikazioa ikasi zuten Mondragon Unibertsitatean. Aztarna Productions egitasmoa sortu zuten, eta dokumental laburrak ekoitzi dituzte, besteak beste, Eraman zutela, Arantzadi Zientzia Elkartearekin eta Olargi taldearekin lankidetzan. Dokumentalaren ondoren solasaldi bat eginen da, eta bertan Iosu Chuecak hartuko du parte: Historia Garaikidean doktorea da, eta Espainiako Bigarren Errepublikaren, Gerra Zibilaren eta haren ondoriozko erbesteratzearen eta Trantsizio Demokratikoaren inguruan ere ikertu du.
Otsailaren 10ean, asteartearekin, Asisko Urmeneta iruindarrak zuzendutako Sorgina banaiz dokumentala proiektatuko da 19:30ean. Filmak sorgin-ehiza ulertzeko perspektiba historiko eta kritikoa eskaintzen du, 1525ean –duela 500 urte– Auritzen hasitako jazarpena abiapuntu hartuta. Hilabete bat geroago, maiatzaren 10ean (asteartea), Lurdes Iriondo, ez gera alferrik pasako dokumentalarekin emanen zaio amaiera hiruhilekoari: Inge Mendioroz Ibañezek zuzendu eta Inge Mendioroz Ibañezek egin zuen gidoia. Dokumentalak Lurdes Iriondo berreskuratzen du, haren bizitza eta ondarea balioetsiz: euskarazko musikan aitzindaria izan zen, eta ezinbesteko erreferentea da euskal kulturaren transmisioan.
NEGUKO KULTUR ZIKLOA. IRUÑEKO UDALA ETA NAFARROAKO ATENEOA
Urtarrilak 13, asteartea. 19:30 Kondestable
Eraman zutela. Deñe Garcia-Bravo eta Mikel Balerdi Arruabarrena. Ondoren eginen den solasaldian Iosu Chueca arituko da hizlari
Otsailak 10, asteartea. 19:30. Kondestable
Sorgina banaiz. Asisko Urmeneta. Ondoren eginen den solasaldian Asisko Urmeneta arituko da hizlari
Martxoak 10, asteartea. 19:30. Kondestable
Lurdes Iriondo, ez gera alferrik pasako. Inge Mendioroz Ibañez eta Idoia Garzes Aldazabal. Ondoren eginen den solasaldian Inge Mendioroz Ibañez arituko da hizlari