Alde Zaharreko biztanleei zabalik da, apirilaren 16a baino lehen eman behar da izena, apirilaren 19tik 29ra egongo dira apaingarriak jarrita, eta 1.000 euro banatuko dira saritan
Iruñeko Udalak eta Alde Zaharra elkarteak auzo horretako fatxada, balkoi eta leihoak apaintzeko I. Dekorazio Lehiaketa deitu dute, eta heldu den apirilean zehar gauzatuko da. Elkarteak eta Udalak elkarlanean bultzatu duten Udaberriko kanpainako jardueren barruan sartzen da ekimena. Lehiaketak 1.000 euro banatuko ditu saritan, eta Alde Zaharreko edozein biztanlek parte hartu dezake. Hala azaldu dute gaur, prentsaurrekoan, Tokiko Ekonomia Jasangarriko zinegotzi ordezkari Patricia Peralesek eta Alde Zaharreko Merkataritza, Ostalaritza eta Zerbitzuetako elkarteko kudeatzaile Carlos Albillok.
Lehiaketa honen bidez fatxada, balkoi eta leihoak berreskuratu nahi dira Alde Zaharreko elementu bizi gisa, eta horiek berreskuratzearen onura estetikoak eta ingurumenekoak sustatu nahi dira. Apaindutako elementu horietako bakoitzaren atzean herritar baten ekarpena dago: kale bat zein eraikin bat estetikoki hobetzeko, horien ingurumen-kalitatea hobetzeko eta, batez ere, hiri-inguruarekiko harremana hobetzeko, gainontzeko herritarrek gozatu ahalko duten ekarpen pertsonal eta artistiko baten bidez.