Iruñeko Udalak desgaitasuna eta gaixotasun mentala duten bost emakume eta bost gizon sei hilabetez kontratatuko ditu, hiri-altzarien mantentze- eta margoketa-lanak eta nekazaritzako jarduera osagarriak egiteko. Proiektua Nafar Lansarek diruz lagundu eta Estatuko Enplegu Zerbitzu Publikoarekin batera finantzatu da; proiektuaren helburua laneratzeko ibilbide baten bidez pertsona horien enplegagarritasuna sustatzea da, laguntza tekniko baten bidez, Elkarkide gizarte-ekimeneko entitatearekin lankidetzan.
Programaren aurreko edizioa 2025eko abuztutik 2026ko otsailera bitarte egin zen eta, hari esker, bi pertsona lan-merkatura sartu ziren. Horrez gain, hiru pertsona zentro okupazional batean sartu ziren eta beste hiru lana bilatzeko gizarte- eta lan-orientazioko programa batean. Era berean, pertsona batek profesionaltasun-ziurtagiria eskuratzeko prestakuntza bat abiatu zuen eta beste bat behin-behineko ezintasun egoeran zegoen. Emaitzak oso positibotzat jotzen dira eta agerian uzten dute proiektua pertsona horien laneratze-ibilbideetan aurrerapen bat dela.
Ekimena ostegunean abiatuko da, eta oso balorazio ona du parte-hartzaileen aldetik, hala islatzen baita proiektua amaitzean egin ziren galdetegietan. Oro har, gogobetetasun-maila altua adierazi zuten eta 10etik 9,8ko puntuazioa lortu zuen egitasmoak hainbat alderditan, besteak beste, helburuen betetze-mailan eta gizartean eta lanean txertatzeko prozesuan eta programa egiterakoan jasotako laguntzan. Kanpaina guztietan emakumeen aldeko diskriminazio positiboa egiten da, gutxienez parte-hartzaileen erdia izan daitezen.
Proiektuan parte hartzen duten pertsonak 25 eta 36 urte bitartekoak izan ohi dira, aitarekin edo amarekin bizi dira eta lehen mailako ikasketak dituzte. Aldez aurreko lan-esperientzia 1 eta 5 urte bitartekoa izan ohi da, eta azken bost urteotan hamabi hilabete baino gutxiago lan egin dute. Diagnostikorik ohikoenak antsietate-nahasmenduekin eta % 65etik beherako desgaitasun-ziurtagiriarekin lotuta daude.
Jarduketak eta lanak
Jarduerak inguru zabal eta atseginetan egiten dira, langileendako arriskurik gabekoak, hala nola Elkarkideren baratzean eta Arantzadiko parkeko lorategi-eremu irekietan. Gune horietan egindako lanak Landabengo biltegi batean hiri-altzariak berreskuratu eta margotzeko lanekin txandakatuko dituzte. Lan horiei esker, hiria hobetuko dute eta hiri-altzariak berreskuratuko dituzte, eta baratzeko lanei dagokienez, elikagai bankuko onuradunek produktu fresko eta osasungarriak eskuratuko dituzte.
Baratzean eta mintegietan lan osagarriak egiten dituzte, hala nola nekazaritza-produktuak landatzea, bilketa-lanak, poltsak ipintzea, inausketa-lanak, garbiketa-lanak eta belarrak kentzea. Altzariei dagokienez, lixatu, konpondu eta margotzen dituzte, bai parke eta espazio irekietan, bai Landabengo lokalean ere. Honako elementu hauekin lan egiten dute: iturriak, bankuak, barandak, eskudelak, zuhaitzak babesteko objektuak, bizikletendako aparkalekuak, jaietarako elementuak eta abar. Lan horiek egiterakoan, parte-hartzaileek Elkarkideko teknikarien gizarteratze-teknikari bat eta pinturako ofizial bat kontratatu dituzte.
Zeharkako lan-trebetasunak ere landuko dituzte, hala nola bertaratzea, puntualtasuna, talde-lana, jarraitutasuna, pazientzia, egoeren kudeaketa eta konpromisoa. Proiektuaren barruan pintura- eta baratze-lanen esparruko prestakuntzak egiten dira, bai eta enplegagarritasuna hobetzeko beste ekintza batzuk ere: lana bilatzeko ikastaro bat eta digitalizazioa.