Txantreako Salestarrak Zentro Komunitarioak 2022an barneko itxura berria estreinatu du egokitzapen-lanen eta azken hilabeteetan ekipamendu berria erosi ondoren, bai eta kanpokoa ere, auzoko Gabonetako orgak eta kabalkaden materialak gordetzeko estalitako espazio bat egokitu ondoren. Herritarren Aferen Batzordeko kideek zentroa (Iruñerria kalea, 24) bisitatu dute gaur goizean.
Iruñeko Udalak azken hilabeteetan hiriko hainbat zentro komunitario hobetzeko jarduketak egin ditu, guztira 101.000 euroko aurrekontuarekin. Horietatik, 31.000 euro Salestarren zentroan egindako lanei dagozkie, zentro komunitario horretan auzoko kabalkadako materiala gordetzeko leku bat egokitzeko.
Espazio hori, hain zuzen, auzoko eskariei erantzuteko eraiki da, urte batetik bestera materiala eta orgak gordetzeko toki bat behar baitzuten, horiek kontserbatu eta narriadura ahal den heinean ekiditeko. Horretarako, patioan dagoen etxabe txiki bat handitu da, komentua martxan zegoenean jada existitzen zena. Egindako jarduketaren ondorioz, handitu egin da erraz muntatu eta desmuntatu daitekeen metalezko egitura batekin, 70 metro koadrora iritsi arte. Obra osatzeko, alboko eraikinaren zorrotenak berritu dira, biltegi berrian hezetasunik egon ez dadin, eta instalazio elektrikoa egin da.
Espazio horretaz gain, Txantreako Zentro Komunitarioaren barneko aldean ere hainbat hobekuntza egin dira, Iruñeko Udaleko Gizarte Enplegurako Programako langileen lankidetzarekin. Zehazki, aretoak margotu dira, hala beheko solairuan nola goikoan, korridoreak eta arotzeriak barne. Halaber, aretoak banatzen dituzten kristaletan biniloak jarri dira taldeen intimitatea gordetzeko jarduerak egin bitartean.
Gainera, aretoetako altzariak berrantolatu eta berritu dira, erabiltzen dituzten kolektiboen beharrak kontuan hartuta. Hala, altzariak erosi dira zeudenak berritu eta osatzeko. Aulkiez gain, zentroa armairuez, apalategiez eta arbel mugikorrez hornitu da. Ikus-entzunezkoen aretoan proiekzio-sistema jarri da: proiektore finko bat sabaian, pantaila bat eta soinu sistema bat, hitzaldiak eta prestakuntzak eman ahal izateko. Era berean, ispiluak paratu dira aretoetako batean, mugimendu-jarduerak egiteko leku gisa egokitzeko xedez. Ekipamendu berriaren xedea da zentroaren erabiltzaile diren kolektibo eta elkarteek planteatutako beharrei erantzuna ematea.
Lanek ere, zentroko areto nagusia izan dute ardatz, zeina ekitaldiak egiteko materialaz hornitu baita. Era berean, gune-eszenikoa eta kamerinoak egokitzeko lanetan ari dira, azken urtean bertatik pasatu diren taldeen iradokizunei jarraituz.
Salestarren kanpoko aldeko ekipamenduan ere hobekuntzak egin dira. Ildo horretan, aldez aurretik zeuden saskien taulak berritu dira, eta bi minibasket saski berri jarri dira haurrek kirola praktikatzeko aukera izan dezaten.
Elkartzeko eta elkarte-bizitza bultzatzeko gunea
Zentro komunitarioak auzotar orori irekitako udal-espazio bilakatu dira, elkarte-bizitza sustatu eta parte-hartze aktiboa bultzatzeko. Bertan, irabazi-asmorik gabeko pertsonek eta erakundeek bultzatutako jarduerak egiten dira, auzoan elkarrekintza eta kolektiboen arteko topaketa sustatzen dutenak.
Egun, Iruñean hamaika zentro komunitario daude hiriko auzoetan. Guztiendako altzari berriak erosi dira, aurretik zeudenak berritu eta osatzeko, besteak beste, aulkiak, armairuak, apalategiak eta arbel mugikorrak. Gainera, lokalak ireki eta ixteko sistema osatu da, modu horretan, horien segurtasuna hobetuz.
Halaber, Ermitagañako lokalean (Bartolomé de Carranza k., 52) soinu-instalazioa egin da panel akustikoen sistema baten bidez, eta Mendillorrin, Antzaran, auzoko erraldoiak gordetzeko gortina bereizle bat jarri da. Bi hobekuntza horiek zentroko kolektiboek eskatutakoak dira.
Erabilgarri dauden aretoen erabilera eta horietarako sarbidea hobetzeko Iruñeko Udala onlineko aplikazio bat garatzen ari da aretoen eskaerak eta erreserbak kudeatzeko egutegi batekin.