The Titanians taldearen jamaikar doinuak eta budu sustraiak dituen BIM (Benin International Musical) taldearen rocka izanen dira Compañía plazako protagonistak, astelehenean

Compañia plazako agertokiak hitzordu bikoitza du astelehenean: The Titanians taldearen Jamaikako doinuak, 20:00etan, eta BIM (Bénin International Musical) taldearen erritmo afrikarrak, 23:30ean. Plaza arratsaldez bertako talentua erakusteko eta munduko musikak Iruñeraino gerturatzeko gune alternatibo gisa finkatu da.

The Titanians taldearen zuzeneko originalak abiatuko dira arratsaldean, sorkuntza propioa eta roots-reggae generoko eragin klasikoak uztartuz. Zortzi interprete, haize, bateria, baxu, gitarra, teklatu, emakumezko ahots eta koru atalekin, egungo soinua eskaintzeko, euskaraz, gaztelaniaz eta ingelesez idatzitako letrekin. Hamar urte baino gehiago daramatza The Titanians taldeak jamaikar doinuak zabaltzen, eta helburu bera duten hainbat kolektibotako kide aktiboak dira, besteak beste Arga Music Studio, Tritone Grabazioak, Sustraian Records eta The Aggromondarrak.

Diskografian nabarmentzen dira, Unidad y fuerza (2021), Txisi Txamas ahots nagusi duen lehen lana; The right way (2019), eta Raperos de Emaus iruindarrekin kaleratutako La ley del hambre (2016) rap diskoa. 2016an, From Zero Koma to The Titanians kaleratu zuten, eta 2017an iritsi zen haien lehen 7”, Love & Hate / Vanity, Payoh Soul Rebel ahotsean zutela, gehi bi single, No Tricks eta One Sound, ordutik ahotsean emakumezkoen erreferente izan denaren aurkezpen gisa balio dutenak: Irati Sweet Juice.

2017an bertan, enbor nagusitik beste adar bat jaio zen, Titanians in Dub, zuzeneko handinahi bat gerturatzen duena, dub, haize eta ahotsarekin zuzenean eta sound system eszenarako ekoizpen propioekin. 2022an, Tritone Grabacionesen eskutik  7” Tú me llevas / Sonido Campeón argitaratu zuten, eta joan den 2023an Amasa La Masa singlea Txisi hitzetan zela. Aurten Helmuga aurkeztuko dute, euskarazko lehen bi ebakiak biltzen dituen azken lana, bere egiteko eta adierazteko modua sendotzea dakarrena.

Afrikar soinuak gauerako
BIM (Bénin International Musical) taldearen soinu afrikarrak izango dira protagonista 23:30ean. BIM talde paregabea da, rocka eta rapa bere jatorri buduetara itzultzen dituena, kontzertu bakoitzean esperientzia paregabea sortuz. Bi urtetan eta 20 herrialde baino gehiagotan (Europan, Afrikan, Estatu Batuetan eta Kanadan) 70 hitzordu baino gehiagoko nazioarteko ibilbidearekin iritsi dira Iruñera. 

BIMek New Yorkeko Performing Arts Center-en emanaldi bat eskaini zuen 2018an, sarrerak agortuta; Angélique Kidjok aurkitu zituen, zeinak Carnegie Hall ospetsuaren ateak ireki baitzizkien 2019an, berriz sarrera guztiak salduta. Erritmo propio baten bidez, BIMeko zazpi artistek beren arbasoen musikari omenaldia egiten diote eta “Ago” jai tradizionaletako musika islatzen dute, Cotonouko ekitaldi sozialei eta moda-klubei lotutako zeremoniak ekarrita. Taldearen proiektua bere herrialdeko musika aberastasuna mundu osoan aintzat hartzea da, kontzertu eta tailer praktikoak eskainiz (perkusioa, kantua, dantza), baita Beningo musikari eta buduari buruzko hezkuntza hitzaldiak ere.


2024KO SANFERMINAK COMPAÑÍA PLAZA

• Uztailak 8, astelehena
  • 20:00. The Titanians
  • 23:30. BIM (Benin International Musical)
• Uztailak 9, asteartea
  • 20:00. Ostatua Kolektiboa
  • 23:30. Champian Fulton Trio
• Uztailak 10, asteazkena
  • 23:30. Tremendo Piquete
  • 23:30. Staples Jr. Singers.
• Uztailak 11, osteguna
  • 19:00. maKeda
  • 23:30. A Thousand Horses
• Uztailak 12, ostirala
  • 20:00. Hofe x 4:40
  • 23:30. Mad Professor + Roots Daughters : Sandra Cross, Sister Audrey eta Amarra
• Uztailak 13, larunbata
  • 20:00. Safu
  • 23:30. Son Rompe Pera