Erromintxelak swing taldeak emanen dio amaiera 2026ko Kantu eta Hitza zikloari: Nork erran eni izeneko lehen lana aurkeztuko du 20:00etan, O-ko Andre María plazan. Eguraldia txarra izanen dela aurreikusten bada, Erraldoien Txokoan eginen da emanaldia. Barruti horrek edukiera mugatua duenez, entzule bakoitzeko bi sarrera emanen dira, leku berean, kontzertua hasi baino ordubete lehenago.
Maiatzean eta ekainean askotariko musika-proposamenak eskaini ditu euskaraz Kantu eta Hitza zikloak: folka, reggaea eta rock alternatiboa, besteak beste, baita gipsy swing estiloa ere, aipatutako azken emanaldi horren protagonista baita.
Erromintxelak 2021ean sortu zen Arrasaten, swing estiloko musika eta euskarazko letra poetikoak uztartzeko xedez. Sei musikarik osatzen dute taldea, aurrez beste proiektu batzuetan elkarrekin aritutakoak: Jon García (ahotsa eta gitarra), Iñigo Zubizarreta (manouche gitarra), Aitor Moreno (kontrabaxua), Jokin Vitoria (washboarda, bateria eta koruak), Andoni Aizpuru (saxo sopranoa) eta Daniel Apodaka (biolina). Guztiak eskarmentu handiko musikariak dira, prestakuntza esanguratsukoak, eta emanaldiak EAEko musika-eskoletan eta kontserbatorioetan irakasle gisa egiten duten lanarekin uztartzen dituzte.
Indar handiko zuzenekoa dute, swing eta gipsy estiloko musikaren dinamismoan oinarritutakoa, eta hainbat instrumentu akustiko erabilita ikuskizun dibertigarria eskaintzen dute inprobisazioarekin jolasean, entzuleen parte-hartzea eta laguntza bultzatzeko xedez. Azken urteotan, beren musika-proposamena hainbat gune eta jaialditan eskaini dute, hala nola Kutxa Fundazioa Klubean, Glad Is The Day jaialdian, Pasaia Itsas Festibalean eta San Agustin Kulturgunean.