Natura mehatxatua da ‘Artea Oinez 2023’ erakusketaren ardatza, eta Kondestablearen jauregian egonen da ikusgai 86 sortzaileren lana

Kondestablearen jauregian egonen da ikusgai gaurtik (martxoaren 31) maiatzaren 7ra ‘Artea Oinez 23’. Aurten Etxarri-Aranatzeko Andra Mari Ikastolak antolatzen duen Nafarroa Oinezeko jardueretako bat da erakusketa. Natura mehatxatua da 83 artistaren hausnarketaren ardatza. Egileek beren obren, sorten eta instalazioen bitartez ohartarazten dute ingurunearen gehiegizko erabilera bihozgabe eta arduragabeak ustekabeko eraginak dituen naturaren degradazioa eragiten ari dela eta hori gizakiendako suizida dela.

Edizio honetan, halaber, Asunción Goikoetxeari (Bakaiku, 1962) omenaldia egin nahi zaio. Arte Ederretan lizentziaduna Euskal Herriko Unibertsitatean, bere lanek jardun poetikoa zein politikoa aldarrikatzen dute, aniztasunaren ugaritasuna baieztatuz eta emakumeak, ikusezintasun sozial, politiko eta sinbolikoaren maila aldakor batek kolpatuak, ikusaraztearen aldeko apustua eginez Erakusketak ‘Hutsuneak/Vacíos’ bere lana jasotzen du, bere egungo une artistikoaren adierazgarri dena. Egilea gaur arratsaldean, 18:00etan, eginen den inaugurazio-ekitaldian izanen da.

Erakusketan hainbat hizkuntza eta teknika biltzen dira, eta azpimarragarria da osagarri esperimentala, ikusleak egungo artean eta bere proposamenetan murgiltzera gonbidatzen dituena. Jorge Urdánoz Iruñeko Udaleko Kultura eta Berdintasuneko Alorreko zuzendariak, Iñigo Orella Etxarri-Aranatzeko Andra Mari Ikastolako zuzendariak eta Josu Reparaz Nafarroako Ikastolen Federazioaren zuzendari eta erakusketaren komisarioak gaur goizean aurkeztu dituzte ‘Artea Oinez 2023ko’ edukiak.

Ikusgai dauden lanen gehiengoa abstraktua da eta, besteak beste, 83 sortzaileek erakundeari eskuzabaltasunez eman dizkioten eskulturak, pinturak, marrazkiak, collageak, instalazioak, argazkiak, grabatuak, bideoak eta inprimaketa digitalak aurki daitezke. Artisten artean bere obra ezagutzera ematen duten emakume artisten ehunekoa (aurten 32 emakume dira) handituz doa.

Ikastolen Elkarteak Udalarekin elkarlanean antolatutako erakusketa Kale Nagusiko 2. zenbakiko eraikineko lehen solairuko bi aretotan bisitatzen ahal da, astelehenetik igandera, 09:00etatik 14:00etara eta 17:00etatik 21:00etara. Aste Santuan aretoak itxita egonen dira apirilaren 6an, 7an eta 10ean.