Ikuttuz, oreka ukiezina erakusketa kolektiboak ostegunean berriz irekiko du Ziudadelako kultur programazioa sanferminetan itxita egon ondoren. Irailaren 14ra bitarte, Nafarroako 27 emakume eskultorek osatzen duten erakusketa honetan ez da ikuspegien eta artisten estiloen aniztasuna bakarrik nabarmenduko, artearen garrantzia ere azpimarratuko da lotura- eta hausnarketa-bitarteko gisa.
Maider Beloki Unzu Kulturako, Jaietako, Hezkuntzako eta Kiroleko zinegotzi ordezkariak, Maider Lizarraga Begué erakusketaren komisario eta bertan parte hartzen duen artistak eta Belén Arévalo Rodríguez Arte On – Nafarroako eskultoreen elkarteko lehendakari eta erakusketan ere parte hartzen duenak aurkeztu dute historikoki gizonek menperatu duten arlo batean 27 emakume eskultoreren talentua ospatzen eta ikusarazten duen erakusketa. Artista bakoitzaren banakako lana ezagutzera emateaz gain, emakumeek arte garaikidean izan duten eraginari buruzko elkarrizketa- eta hausnarketa-gune bat sortu nahi da, hainbat bitartekaritzako jarduera osagarriren bidez.
Erakusketan honako emakume hauek parte hartzen dute: Ainhoa Sánchez, Alicia Osés, Alicia Otaegui, Amaia Conde Chiralt, Beatriz Ciriza, Belén Arévalo, Cristina Cerdán, Cristina Cidrian, Gabriela – Tea en la azotea, Nery Pradenas, Henriette Boutens, Irati Moreno, Maite Canto, María Jiménez, Monika Aranda, Silvia Etxandi, Txaro Fontalba, Victoria Gómez, Jaione Beroiz, Luisa Aldaburu, Maider Lizarraga Begué, Merche Suescun, Estrella Los Arcos, Anabel Barberena, Marijose Recalde, Ysabel Molina eta Nora G. Ojeda. Erakusketa Arte On – Nafarroako Eskultoreen Elkarteak sustatzen du.
Elkarrekintza artistikoa eta hausnarketa egiteko ibilbidea
Eskultura bakoitzak elkarrekintza artistiko bat eragiten du, non ikusleek lanekin elkarrekintza zabal, ireki eta elkarrizketatzailea izateko aukera baitute. Materialak askotarikoak dira: harria zein buztina, bakoitza arreta handiz hautatua, kontzeptuak, emozioak eta oroitzapenak gogora ekartzeko. Lanak espazioan antolatuta dauden moduak hausnarketarako eta aurkikuntzarako gonbidapena egiten duen ibilbidea sortzea du xede, ikusleak forma, testura eta kontzeptuez osatutako unibertso batean murgiltzea ahalbidetzen duena.
Eskulturekin sortzen den harremanak erakusketa ikustera joan direnei artearekin lotura sakonagoa bizitzeko aukera ematen die. Erakusketa honetan zizelkarien trebetasun tekniko eta artistikoaz gain, forma eta testuren bidez proposamen artistiko konplexuak komunikatzeko gaitasuna ere goratzen da.
Bitartekaritzako jarduera osagarriak
Erakusketarekin batera udan zehar bitartekaritzako jarduera osagarrien programa bat eginen da, ostegunean inauguratzen denetik irailaren 13ra (larunbata) bitarte. Gaur arratsaldean, 18:30etik aurrera, publikoari irekitzearekin batera ekitaldi bat eginen da Mistoen eraikinean hainbat artistekin eta zuzeneko musikarekin.
Abuztuaren 2an eta 23an (larunbatak), 19:00etan, erakusketara bisita gidatuak eginen dira, gaztelaniaz zein euskaraz, eta erakusketa kolektiboan parte hartzen duten artista batzuk egonen dira bertan. Abuztuaren 9an (larunbata), 19:00etan, solasaldi bat antolatu dute hainbat artistarekin, gizartearen eta erakusketa-artearen arteko genero-arrakalari buruz.
Irailean azken hiru hitzorduak eginen dira. Irailaren 3an, asteazkenarekin, 19:00etan, solasaldi bat eginen da, hainbat artistarekin, sormen-prozesuak duen gaitasun terapeutikoari buruz hausnarketa egiteko; irailaren 5ean, ostiralarekin, 18:30ean, Mar Aznar Recuenco historialariak La escultura con perspectiva de género hitzaldia emanen du, eta irailaren 13an, 18:30ean, erakusketaren amaiera-ekitaldia eginen da zuzeneko musikarekin eta Alicia Otaeguiren performancearekin.