Sevillako Miura ganadutegiko zezenak izanen dira aurten Gaseko eskortak eta San Domingoko eskortak bereizten dituzten 400 metroak eginen dituzten azkenak. Entzierrillo hori gaur arratsaldean eginen da, isiltasunean eta lasterkaririk gabe, zezenek hurrengo eguneko Entzierroaren aurretik San Domingoko eskortetan lo egiteko egiten duten lasterketa horretan ohikoa den bezala.
Lasterketa horrek zerikusi gutxi edo batere ez du Entzierroarekin. Jende-pilaketen, estropezuen eta goizeko lasterketako erorikoen aurrean, Entzierrilloan, hurrengo egunean toreatuko diren sei zezenek bakarrik egiten dute korrika. Ez dago inor zirikatzen edo molestatzen dituenik. Ez dituzte korrikalariak saihestu behar. Zezenak eta asfaltoa baino ez, unaiek eta joaldunek soilik lagunduta. Isiltasunean eta eguzkia jada sartu denean. Hirurehun pertsona inguruk dute aukera sanferminetako une paregabe horretaz gozatzeko, Iruñeko Udalak festetako egun bakoitzerako zozketatu zituen 175 baimen-txartel bikoitzei esker.
Izan ere, Udalak duela zenbait urte erabaki zuen ekitaldi horretarako bertaratzea erregulatzea, zeinetara gero eta jende gehiago joaten baitzen, zezenen segurtasuna bermatze aldera. Hala, ekainean zozketa bidez eskuratzen ahal diren 1.400 baimen eskaintzen ditu–175 egun bakoitzeko– Entzierrilloa hesietatik ikusi ahal izateko. Murrizketa horiek gorabehera, herritarrek minutu eskas bat irauten duen lasterketa horretaz gozatzeko duten interesa ez da gutxitzen. Guztira, 9.549 lagunek eman zuten izena aurtengo baimen-txartelen zozketan. 1.400 sarituek une horretaz gozatzeko aukera izan dute pertsona batek lagunduta, betiere Entzierrilloaren ibilbidea erregulatzen duten Iruñeko Udaltzainen jarraibideekin bat. Dagokien txartel-baimena edukitzeaz gain, bertaratuek isilik egon behar dute lasterketak iraun bitartean eta flashik ez erabili argazkiak egiterakoan, zezenak ez despistatzeko eta hurrengo egunean eginen duten lasterketa ez baldintzatzeko.
Miura ganadutegiko zezenak igaro ostean, 2025eko uztailaren 6ra arte itxaron beharko dugu Entzierrilloaz berriz gozatzeko.