Ingurumen Hezkuntzako Museoko Jasangarritasun Eskolak udazken honetan proposatuko du gertukoa, Ziudadelan, Media Lunan edo hiri-baratzeetan inguratzen gaituzten animaliak eta landareak, ezagutzera ateratzea, eta urrutiko lurraldeetara hurbiltzea dokumentalen emanaldien bidez. Hitzaldien, ikastaroen eta ateraldien bidez, aztarnari izan, eta aztarna freskoak, lumak edo hegaldi mota desberdinak ikusi, animaliak aurkitu, hala nola kastoreak eta bisoiak, eta zaintzen laguntzen duten landareez gehiago jakiten ahalko da.
Halaber, udazkenean ere zinema-pantaila baten bidez aukera izanen da ikusteko urpekarien maisu bihurtzen den olagarroa edo oraina eta etorkizuna elikatzen dituzten fruituak lurretik ateratzen dituzten nekazarien bizitza. Jardueren artean badaude lantegiak, ikastaroak, ateraldiak, dirurik gabeko truke-azoka txikiak eta bizikletak elkar trukatzeko azoka txikiak eta ‘Iruña berdea da’ zikloaren barruan daudenak.
Programazio osoa eta eguneratua Ingurumen Hezkuntzako webgunean dago. Halaber, kontsultak egin daitezke 948 149 804 telefonoan edo Ingurumen Hezkuntzako Museoan (Errotazarko kalea, z.g.) Jasangarritasun Eskola ‘Go Green Iruña’ udal-estrategiaren jarduera eta ekintzen artean dago. Estrategia horrek ingurumen-jasangarritasunaren arloan eta klima-aldaketaren aurka egiten diren jarduketa guztiak biltzen ditu.
Jarduerak doakoak dira parte-hartzaileentzat, eta, beraz, Ingurumen Hezkuntzako zerbitzuak eskatu du ondo egiaztatzea ea lekurik dagoen izena eman aurretik, edo erreserbak bertan behera uztea, joaterik ez badute. Izan ere, bajek, erreserba bertan behera uzten ez bada, eragiten ahal dute itxarote-zerrendan daudenek aukerarik ez izatea hutsik geratutako lekuak betetzeko. Programazioa osasun-arauekin bat eginen da.
Aste honetan, bizikleta-ibilaldia, bizikleten azoka txikia, erakusketa eta ipuin-kontalaria
Aste honetan hasiko da Jasangarritasun Eskolako programazioa, eta eskainiko ditu bizikleta-ibilaldi bat, bizikletak elkar trukatzeko azoka txiki bat, erakusketa bat, ipuin-kontalari bat eta dagoeneko leku guztiak beteta dituen bizikletak konpontzeko lantegi bat.
‘Jakin ezazu nola ari den Iruña klima-aldaketari aurre egiten’ bizikleta-ibilbidea bihar izanen da, urriaren 5ean, 18:00etatik 19:30era, ezagutzeko zer neurri ari den hartzen Iruñeko Udala klima-aldaketari egokitzeko eta isurketak murrizteko. Marta Torres Tokiko Agenda 21eko zerbitzuko udal-teknikariaren eta Iruñeko Udalaren Energia Agentziako Javier Zardoyaren eskutik. Aldez aurretik izena eman behar da, 010ean edo 948 420 100 zenbakian.
Bihar ere, Gutun-truke Eko-sistemak erakusketa bisitatu daiteke, ‘Iruña: hiria ekosistema gisara’ arte-egonaldian hautatutako proiektua. Hura gauzatzeko, parte hartzeko deia egin zen, eta bertan hiriari ekosistema gisa erreferentzia egiten zioten objektuak bildu ziren. Maider Garayok, Paula Toránek eta Nahia Villanuevak garatutako lanaren abiapuntua izan zen. Erakusketa azaroaren 12ra bitarte izanen da ikusgai.
Biharko hirugarren proposamena, bizikletak elkar trukatzeko merkatuaren irekiera, ostirala arte luzatuko da. Bizikletaren aurretiazko balorazioa eginen da, eta hori horrela, balio bereko bizikletengatik baino ezin izanen dira trukatu. Ordutegia: asteartetik ostegunera, 10:00etatik 13:00etara eta 18:00etatik 20:00etara, eta ostiraletan, 10:00etatik 13:00etara.
Asteari buru emateko, larunbatean ‘Iruña berdea da’ zikloaren beste edizio bat hasiko da, ipuin-kontalari saio batekin, Sergio de Andrésen eskutik. ‘Berdetako istorioak - kontuan eroritako istorioak’ jardueran paseo bat emanen da Ziudadelan barna bere txokoek gordetzen dituzten istorioak ezagutzeko. 12:00etan hasiko da, eta aldez aurretik eman behar da izena 010 edo 948 420 100 telefonoetan. Azaroaren 6an antzeko jarduera bat eginen da Yamaguchi parkean.
Beste proposamen batzuk datozen asteetarako
Programazioarekin jarraitzeko, hirigintzak tenperaturan duen eraginari edo bisoi europarrari buruzko hitzaldiak eginen dira, udazkeneko lanei buruzko agroekologia-lantegi bat eta haziak hautatu, bildu eta ateratzeko beste lantegi bat, edo oinezkoen pasabide iragazkorrei bisita gidatua bat.
Lantegien artean, badaude familiartean naturaren formak ikustekoak edo estanpazio botanikoari buruz ikastekoak. ‘Iruña berdea da’ zikloak natura-ateraldiak eskainiko ditu Ziudadelan eta Media Luna parkean, kastoreak, hegaztiak, Iruñeko auzoetako hiri-baratze komunitarioetako jarduerak eta hiri-gimnasioak ezagutzeko. Lantegien artean, eskainiko dira sormen-gaitasunen bidez ingurune naturalarekin harremanetan jartzeko esperimentazio-lantegi bat, sendabelarrei buruzko beste bat eta hiri-baratzearen inguruko hirugarren bat.
Zinema-dokumentala programazioan izanen da berriz ere #LabMeCrazy! jaialdiko hautaketa baten bidez. Jaialdia Nafarroako Unibertsitateko Zientzietako Museoaren ekimena da, Iruñeko Udalaren laguntzarekin, eta Arrea elkarte agroekologikoaren ekoizpen bat. Guztira lau emanaldi izanen dira. Azkenik, berriz ere eginen dira dirurik gabeko truke-azoka txikien beste saio batzuk eta udazkeneko bigarren erakusketa saguzarrei buruzkoa izanen da.