Itxaso Aristizabal, Musika Kapera, Paulino Otamendi orkestra eta Amaia Huarte zein La Pamplonesa izanen dira protagonista Batasunaren Pribilegioaren kariaz eginen diren doako lau kontzertuetan

Itxaso Aristizabal, Musika Kapera, Paulino Otamendi orkestra eta Amaia Huarte zein La Pamplonesa izanen dira protagonista Batasunaren Pribilegioaren kariaz eginen diren doako lau kontzertuetan
Asteazken, ostegun, larunbat eta igandean izanen dira, eta, hurrenez hurren, toki hauetan: San Zernin, Katedraleko errefektorioa, Kondestable eta Gazteluko plaza

Joan den larunbatean Nafarroako Orkestra Sinfonikoak emanaldia eskaini ostean, bihar, asteazkenean, Iruñeko Udalak Batasunaren Pribilegioaren ospakizunaren kariaz antolatutako doako kontzertuek jarraituko dute. Lau kontzertu gehiago izanen dira, honako hauek emanda: Itxaso Aristizabal piano-jotzailea, Katedraleko musika-kapera, Paulino Otamendi orkestra Amaia Huarte sopranoarekin eta, azkenik, 8an, Batasunaren Pribilegioaren egunean, La Pamplonesa. 

Bihar –asteazkenean–, 20:00etan, Itxaso Aristizabalek Valentín Larrea Yturbe (Gabiria, Gipuzkoa, 1876 – Iruña 1970) musikagile eta piano-jotzailearen pianorako lanak joko ditu, San Zernin elizan haren omenez izanen den kontzertuan. Eslava Kasino Berriko piano-jotzaile titularra izan zen Larrea 50 urtez, eta Aramendía piano- eta hari-boskoteko kidea izan zen. Horren lanak era askotako konposizioak ditu: piano, hari eta txisturakoak, abesbatza-musika, musika erlijiosoa... Itxaso Aristizabalek haren errepertorio luzeko lan-sorta hautatua joko du, ahaztutako konposizioak gogora ekarriz eta Nafarroako musika-ondarearen piezak aintzatetsiz.

Ostegunean –irailak 5–, 20:00etan, Musika Kaperak Aurelio Sagaseta kapera-maisuak zuzendutako kontzertua emanen du Katedraleko errefektorioan; bertan, Iruñeko eta Segoviako katedraletako artxiboetatik berreskuratutako lanak izanen dira entzungai. Emanaldiaren lehen atalean berreskuratutako ondarea izanen da ardatz: M. Irízarren Meza 8 ahotsetara, Segoviako katedralekoa, eta Motet anonimoak, Iruñeko katedralekoak. Gainera, hauen lanak ere entzunen dira: Francisco Guerrero, Claude Debussy, A. Illarramendi, Bach, John Rutter eta Aurelio Sagaseta bera. 
Larunbatean, Kondestablen, Paulino Otamendi ganbera-orkestrak eta Amaia Huarte sopranoak eskainiko dute emanaldia, 19:30ean. Programak juglareek eta ministrileek Nafarroako Karlos III.a erregearen gortean jo omen zuten musika du abiapuntu, eta XV. eta XVI. mendeetako Europako instrumentu- eta ahots-errepertorioa hartzen du barne. Erregealdi horretan Nafarroako gorteetan 86 bat ministril izan ziren, frantsesak eta alemanak batik bat. Gehienak hari-juglareak ziren, baina organoa, txalamia, kornamusa eta abar jotzen zituztenak ere bazeuden.

Azkenik, Batasunaren Pribilegioaren egunean bertan, irailaren 8an –igandearekin–La Pamplonesaren txanda izanen da; kontzertuan udal-bandak estilo ezberdinetako piezak joko ditu: musika herrikoia, klasikoa, banden musika eta martxak, XX. mendeko egile amerikar eta europarrek konposatuak. Honako egile hauenak, esaterako: Silvanio Cervantes, Jan Van der Roost, Clemente del Hoyo, Robert Jager, Manuel Turrillas, Pablo Sarasate eta Jesús Guridi. Emanaldia 20:00etan izanen da, Gazteluko plazan.

 

PROGRAMAZIOA BATASUNAREN PRIBILEGIOAREN KARIAZ

 

  • Irailak 4, asteazkena. 20:00. San Zernin eliza. PIANORAKO KONTZERTUA, ITXASO ARISTIZABALEN ESKUTIK. VALENTÍN LARREA YTURBEREN OMENEZ
  • Irailak 5, osteguna. 20:00. Andre Maria katedraleko errefektorioa. KATEDRALEKO MUSIKA KAPERAREN KONTZERTUA.
  • Irailak 7, larunbata. 19:30. Kondestablearen jauregia. PAULINO OTAMENDI GANBERA ORKESTRAREN ETA AMAIA HUARTE SOPRANOAREN KONTZERTUA
  • Irailak 8, igandea. BATASUNAREN PRIBILEGIOAREN EGUNA 20:00. LA PAMPLONESA UDAL BANDAREN KONTZERTUA. Gazteluko plaza