“Ezin da Iruñeko udal-mugartetik atera kirola egiteko, eta beste herrietako auzotarrek ez dute baimenik Iruñekoan sartzeko”. Horra erantzuna herritarrak deseskalatze-egoera berrian orientatzeko aste honetan Iruñeko Udalari egiten ari zaizkion galdera ohikoenetako bati.
COVID-19ari buruzko Iruñeko Udalaren webguneak egokitzen jarraitzen du aldaketei eta herritarrengan kezka sortzen duten galdera berriei erantzuteko. Orain arte bezala, hiriko auzotarrek beren zalantzak igortzen ahal dizkiote Udalari dudascoronavirus@pamplona.es posta elektronikoaren bidez, Udalak galderei informazio ofizialaren berri emanez erantzun diezaien.
Horrez gain, gehien eskatzen diren argibideak eskura jartzeko, eguneratu egin da Iruñeko herritarren galdera ohikoenen atala, dagozkion erantzunekin, https://www.pamplona.es/coronavirus/dudas-desescalada estekan gaztelaniadunentzat eta https://www.pamplona.es/eu/koronabirusa/zalantzak-deseskalada estekan euskaldunentzat. Halaber, gune horretan Iruñeko udalerriaren muga zehatzak jasotzen dituen planoa ere kontsultatu daiteke
#ZurekinZureEtxean
Herritarren zalantza jakinei buruzko gune hau txertaturik dago ekipamendu publikoak itxi eta pandemiari aurre egiteko osasun-prebentzioko lehen neurriak dekretatu zirenean Iruñeko Udalak Koronabirusari lotuta sortu zuen web tematikoan. Mikrosite horretara www.pamplona.es webgunearen hasierako-orritik sartzen da. Azken garai honetan, 90.000 sarrera egin dira Udalak hedatzen dituen zerbitzu publikoko edukietara.
Jarrera proaktiboa sustatzea da diseinuaren ideia, Udalak #ZurekinZureEtxean bidez segi dezala iruindarrei zerbitzuak ematen, horietan lehena izanik egoera honen inguruko eduki garrantzitsuak jakitera eman eta hedatzea. Berariazko web horretan, herritarrek honako eduki hauek kontsultatzen ahal dituzte: Udalak izurriteari aurre egiteko eman duen informazio osoa, herritarrei gizarte-arta emateko berariazko baliabideen egoera, udal-zerbitzuak emateko erabiltzen ari diren formulak, segurtasun-elementuak fabrikatzeko tutorialak eta herritarrei zuzendutako osasun-aholku orokorrak.
Gune horretan nabigatuz gero, beste zerbitzuetara eta aisia- zein prestakuntza proposamen praktikoetara ere sar daiteke, hala nola online eskuragarri dauden denden‘erakusleihora’, izapide digitalak egiteko egoitza elektronikoan zuzenean sartzeko estekara, eta kirolari, kulturari eta herritaren parte-hartzeari lotutako udal-ekimenen gaineko informaziora. Horiez gain, honako hauek ere baditu: urruneko prestakuntza-baliabideak, konfinamenduari buruzko haurren diplomak, lehiaketen oinarriak, Iruñeko Fototeka eta abar.