Iruñeko Udalak datuen burujabetza digitalari buruzko lehenengo foroa antolatu du, Udalaren datu-kudeaketari buruzko barne-hausnarketa estrategikoa egiteko jardunaldia; hiru funtsezko esparruren inguruan egituratuta dago: datuaren gobernantza eta arkitektura instituzionala, hiriari buruzko datuak eta horien aplikazioa, hainbat tresnen bidez –biki digitalak eta adimen artifiziala, kasurako–, eta Udalaren azpiegiturak eta kultura digitala. Jardunaldia martxoaren 25ean (asteazkena) eginen da Ziudadelako Arma aretoan, eta 09:15ean inauguratuko du Joseba Asiron Saez hiriko alkateak.
Datuen burujabetza digitala kontzeptuak erreferentzia egiten dio pertsonek eta erakundeek beren aktibo digitalak, azpiegitura eta eragiketak kontrolatzeko gaitasunari, eta datu horiek beren jurisdikzioko legeen eta araudien arabera biltegiratzen, kudeatzen eta prozesatzen direla ziurtatzen du. Ekitaldiak xede du autonomia digitala eta datuen zaintza publikoa bermatzeko lan egitea eta printzipio, aukera eta ekintza-ildo nagusiak zehaztea. Hausnarketa estrategikoa da, eta 2030eko Hiri Agendarekin lotuta dago, baita Imagina Iruña herritarren prospektiba ariketaren emaitzekin eta Iruña hiri berritzaile gisa kokatzeko lanarekin ere.
Ikuspegi horrek, gainera, bost funtsezko ataletan oinarritutako berrikuntza-eredu bati erantzuten dio. Eredu horrek administrazioak, ezagutza, teknologia, ekonomia-sarea eta herritarrak bateratzen ditu, eta ingurumena ere txertatzen du hiri-erronkei batera heltzeko funtsezko elementu gisa. Aurreikuspenen arabera, hainbat erakundek eta instituziok parte hartuko dute: Iruñeko Udalaz gain, Nafarroako Gobernuko, Nafarroako Unibertsitate Publikoko, ANIMSA Udal Informatikako Nafarroako elkarteko eta Tracasako ordezkariak ere izanen dira bertan, besteak beste.
Instituzio publikoen eta Iruñeko Udalaren bide-orria ez da modu isolatuan sortu: Europar Batasunak sustatu du autonomia digitala indartze aldera eta garrantzizkoak diren hainbat esparrurekiko –datuak, hodeia, adimen artifiziala, erdieroaleak etab.– mendekotasuna murrizteko. Europaren gidaritza horri esker, lehentasunen erreferentzia-esparru bat osatu da estatu mailan: Europako ehun teknologikoaren gaitasun eta premiei egokituta daude lehentasun horiek.
Eztabaida irekitzeko lau hitzaldi iradokitzaile
Jardunaldia 09:15ean abiatuko da alkatearen ongietorriarekin, eta, ondoren, tokiko esparruarendako hainbat kontzeptu testuinguruan jarriko dira, hala nola datuen burujabetza digitala, adimen artifizialaren erabilgarritasuna eta hiri-kudeaketarako biki digitalak garatzea. Horretarako, ‘Hitzaldi inspiratzaileak’ aurkeztuko dira: kasu arrakastatsuak aipatuko dira erreferentzia praktiko eta inspirazio estrategiko gisa.
Aurreikuspenen arabera, honako hauek parte hartuko dute jardunaldiaren une horretan: Humberto Bustince Sola Nafarroako Unibertsitate Publikoko (NUP) Konputazio Zientzien eta Adimen Artifizialeko katedraduna eta Nottinghamgo Unibertsitateko ohorezko irakaslea; Txomin Romero Asturiano DIPC Euskadiko Superkonputazio Zentroko zuzendaria; Anna Quer i Rodríguez Mataróko Udaleko big datako eta datuen adimeneko analista eta Alfonso Pérez Álvaro Logroñoko Udaleko Teknologiako eta Berrikuntzako zuzendari nagusia. Jardunaldia hurbilketa moduko bat izanen da esparru horretako ekimenen arrakastaren balizko faktore kritikoak eta garapenean zehar aurkitutako oztopoak jorratzeko.
Sarreraren ondoren, 10:45ean, saioaren lan-metodologia aurkeztuko da, eta edukien bigarren blokea hasiko da, egungo egoeraren diagnostikoa egiteko. Nahi den agertokia landuko da, eta ekintza jakin batzuk proposatuko dira, digitalizazioaren arloko bide-orria zehazte aldera aurrera egin ahal izateko. Taldekako mahai teknikoen dinamika baten bidez eginen da, eta honako hauei buruz hausnarketa eginen dute: datuak non gorde behar diren, zein egitura behar duen Udalak bere datuak zaindu eta erabiltzeko, zein mendekotasun teknologiko duen erakundeak gaur egun eta Udaleko kultura digitala lantzea.
Lan horretatik abiatuta, irizpide estrategikoak zehazten hasiko dira, eta, ondoren, egiturazko erabakiak hartuko dira, datuen burujabetzaren inguruan udal-estrategia digitala zehazteko oinarriak ezartzea ahalbidetzeko. Patxi Iraizoz Iruñeko Udaleko gerenteak emanen dio amaiera jardunaldiari.