Iruñeak, Mankomunitatearen bidez, Iruñerriko udalerrien eskura jarri ditu jende ugari biltzen den eremuak desinfektatzeko ekipamenduak

Iruñeak, Mankomunitatearen bidez, Iruñerriko udalerrien eskura jarri ditu jende ugari biltzen den eremuak desinfektatzeko ekipamenduak
Ekimena Fomento de Construcciones y Contratas (FCC) enpresaren laguntzarekin osatuko da
Limpiezas

 

Iruñeko Udalak lankidetzan aritzea proposatu dio Iruñerriko Mankomunitateari, garbiketarako zenbait ekipamendu lagaz, horrela indartzeko inguruko beste udalerri batzuei bideen desinfekzio-lanetarako ematen zaien arreta, COVID-19 koronabirusaren hedapenak eragindako osasun-larrialdiari aurre egite aldera. Zehazki, bi furgoi hidrogarbitzaile eta hidrogarbigailua duten bi ibilgailu arin jarriko ditu Udalak beharra duten udalerrien eskura. Horixe proposatu dio Iruñerriko Mankomunitateari, hura baita Iruñerrian zerbitzu-emaile nagusia. Iruñeak garbiketarako 46 ibilgailu ditu, eta joan den martxoaren 16tik, hain justu, bertan behera utzi zuen ekorketa-zerbitzuen parte handi bat, beste batzuk sustatzeko, hala nola espaloiak eta galtzadak produktu desinfektatzaileez garbitzekoak.
 

Udalak eta Mankomunitateak sinatutako hitzarmenean, 4 ibilgailu horiek ez ezik bi gidari ere jarriko ditu Iruñeak. Behar diren beste bi gidariak Mankomunitateak jarriko ditu. Ekimenean FCC enpresak ere aktiboki jardunen du lankidetzan; enpresa hori, hain zuzen, hiriko garbiketa-zerbitzuaren adjudikazioduna da, eta Mankomunitaterako hondakin-bilketako zerbitzuarena. Bere gain hartuko ditu erregaiaren kostua, makinak mantentzearena, garbiketa-produktuena eta langileen desinfekzioarena. Antsoaingo Udalak ere furgoi hidrogarbitzaile bat laga dio Mankomunitateari, krisi hau hasi zenetik edukiontziak dauden lekuetan egiten ari diren desinfekzio-lan trinkoak indartzeko.
 

Zerbitzua astelehenean abiatu zen Atarrabian, Burlatan, Otazun, Iberon, Aratzurin, Berriozaren, Arren eta Etxaurin; Iruñean egiten ari den bezala, pistola bidez eta produktu desinfektatzaileez garbitzen dituzte osasun-zentro, merkataritza-gune eta jendearen joan-etorri ugari izaten dituzten beste zenbait tokiren, hala nola autobus geraleku edo elikagai-denden inguruetako gainazalak, zakarrontziak, edukiontziak, markesinak eta altzariak, oro har. Horretarako, gaitasun biruzida duten biozida-fungizidak erabiliko dituzte. Garbiketa-lanak arratsaldez egiten dira, 14:00ak eta 22:00ak bitarte.
 

FCC enpresak interesa dutenekin harremanetan jartzen jarraituko du, jarduketak planifikatze aldera. Udalek Mankomunitatearen Bezeroendako Arreta Zerbitzuaren bidez (948423242) eska dezakete zerbitzu hau.

¿Te ha sido útil esta página?