Iruña mugimenduan programa dibertsitate funtzionala duten gazteak elkartzeko gunea da, eta dagoeneko abian da Gaztediaren Etxean, abenduaren 19ra bitarteko larunbatetan, 11:00etatik 13:00etara. Zikloak barne hartzen dituen jarduera guztiak doan dira, eta entretenimendua eta hezkuntza bultzatzeko gune seguru izatea dute helburu; hala, artearen eta hezkuntza-berrikuntzaren bitartez, parte-hartzaileen autonomia, ongizatea, gozamena eta sozializazioa bultzatzen dira.
Gehienez 12 lagunek parte hartzen ahal dute gune horietan: saio batetik bestera aldatzen ahal dira, eta, haiei esker, elkarrengandik ikasteko komunitate txiki bat sortzen da; hala, giro ona eta talde-dinamika egokiak sortzen dira entretenimendu-esperientzia positiboak, taldekako praktikak, erronkak ebaztea eta musika-jolasak, besteak beste, abiapuntu hartuta. Dinamizazioaren arloko espezialistek ematen dituzte saioak, eta, kalera ateraldiak egiten direnean, kopuru hori taldearen beharren arabera handitzen da.
Saioak gaztelaniaz dinamizatuko dira, eta espezialistekin euskaraz egiten ahal da, elebidunak baitira. Zalantzaren bat izanez gero eta programari buruz gehiago jakiteko, bash@bateraaske.com helbide elektronikora idazten ahal da, edo, bestela, 666 25 43 76 telefono-zenbakira deitzeko aukera dago. Gaztediaren Etxean egin ohi diren bi orduko saioez gain, beste saio berezi batzuk eginen dira, hiru ordukoak, eta horietan ere jarduera batzuk eraikinaren kanpoaldean eginen dira, konfiantza eta autonomia hobetzeko xedez.
Hauek dira proposamenaren berariazko helburuak, parte-hartzaileen ezaugarrietara egokituak: adimen mota guztiak, inprobisazio artistikoa eta gorputz-mugimendua lantzea, jolasaren bitartez esperientzia dibertigarri bat eskaintzea eta sormena, egiazkotasuna eta autoestimua indartzea.
Programa finkatuta dago
Iruñeko programa aisialdi-eskaintza iraunkor gisa finkatu da larunbat goizetan, eta guztira 29 saio egin dira 2025eko urritik 2026ko ekainera bitarte. Guztira 14 eta 30 urte bitarteko 21 gaztek hartu dute parte, 5 emakumek eta 16 gizonek, eta oso balorazio positiboa egin dute. Jarduerek eta proposamenek harremanetan, eta norberaren eta taldearen konfiantzan jarri dute arreta. Taldekako ateraldiei esker, kuadrillan partekatzeko eta gozatzeko guneak sortu dira. Gehienetan parte hartu dutenek adierazi dute behar-beharrezkoa dela Iruñeko aisialdiaz eta entretenimenduaz gozatzeko talde bat sortzea. Gainera, jende ugarik parte hartu duenez, gazteek trebetasun sozialak garatu eta lagun berriak egin dituzte.
Proposatutako saioetan, hala nola plan, irteera eta bestelakoetan, jende gehiagok parte hartzen du, eta oso iritzi ona dute horien inguruan. Ohiko dinamika hausten duten jarduerek taldearen konpromisoa sendotzen dute bereziki. Ihesaldiek, plan bereziek eta beste programa batzuetako parte-hartzaileekin egindako topaketek denboran zehar irauten duten oroitzapen politak eta partekatutako momentuak sortzen dituzte, eta plan horiek errepikatu nahi dituztela ere adierazi dute taldekideek. Esperientzia horiek harremanak sendotzen dituzte, eta lagungarriak dira taldearen barruan konfiantzaz beteriko giroa sortzeko.
Parte-hartzaile berriek taldea aberasten dute, nahiz eta denbora behar duten gunera eta jadanik eraikitako dinamika eta harremanetara egokitzeko. Prozesuak, halaber, aukera ematen du denbora gehiago daramatzatenek protagonismo handiagoa izateko eta horiek sartu berri direnei laguntza emateko.
Parte-hartzaileen familiek askotariko behar eta egoerak dituzte, eta horiek ere jakinarazi dute programari buruz duten iritzia. Laguntza gehien behar dituztenek sareak ehuntzeko, esperientziak partekatzeko eta instituzioen aurrean ahotsa izateko guneak eskatzen dituzte batez ere. Programak, gazteen parte-hartzea bultzatzeaz gain, familiek bat egiteko eta haiei laguntzeko gune izan nahi du, familia-ingurunetik kanpo sare gutxi dituzten kasu horiei, batik bat, laguntza emateko.