Haur Eskolen Batzordeak onetsi du hiru urtean euskarazko 102 leku gehiago eskaintzea

Iruñeko Haur Eskoletako Gobernu Batzarrak gaur goizean onetsi du datozen hiru urteetan euskarazko leku gehiago eskaintzeko proposamena. Hala, 2027 – 2028ko ikasturtean euskarazko 102 leku berri izanen dituzte Mendebaldea eta Printzearen Harresi haur-eskoletan, eta Donibanen eraikiko duten horretan: kartzela zaharraren orubean eginen duten zentroan eraikiko dute.      Hiru eskolek eredu mistoa izanen dute (euskara-gaztelania). Leku berriak modu mailakatuan eskainiko dituzte, eta horrela, haurrek hizkuntza-eredu eta zentro berean osatuko dute zikloa.    Gaur gehiengoz onetsi dituzte aldaketak: egun lekuen % 24 eskaintzen dituzte euskaraz, eta, aldaketen ondoren, lekuen % 31.      

2025-2026ko ikasturtean euskarazko 59 leku eskainiko dituzte bi eskola horietan.   Mendebaldea haur-eskolak soilik gaztelaniazko eredua eskaintzen zuen, baina datorren ikasturtetik aurrera, eredu mistoa eskainiko du.  43 leku eskainiko dituzte euskaraz, eta beste hainbeste gaztelaniaz. Euskarazko beste 16 lekuak Printzearen Harresi haur-eskolan eskainiko dituzte.  Aurtengo ikasturtean gaztelaniazko hiru talde izan dituzte, eta euskarazko bi. Halaber, ingelesa lantzeko jarduerak egiten dituzte talde horietan guztietan. 2025-2026ko ikasturtean, berriz, euskarazko hiru talde eta gaztelaniazko bi izanen dituzte, eta guztietan ingelesa lantzeko jarduerak eginen dituzte.  Aurreikusitako gainerako 102 lekuetatik 43, 2027-2028ko ikasturtean eskainiko dituzte, kartzela zaharreko orubean eraikiko duten haur-eskolan. Hiriko hamahirugarren udal haur-eskola izanen da: 0 eta 3 urte bitarteko haurrendako 86 leku eskainiko dituzte, erdiak euskaraz eta beste erdiak gaztelaniaz. 

2024-2025eko ikasturterako 259 leku eskaini zituzten euskaraz, eta horietatik 129tan ingelesa lantzeko jarduerak eskaintzen zituzten. Halaber, gaztelaniazko 810 leku eskaini ziren, eta horietatik 442tan ingelesa lantzeko jarduerak eskaini zituzten. Hiriko hamabi haur-eskoletan 1.065 leku daude guztira, eta leku guztien % 24 eskaintzen dira euskaraz.  2027-2028ko ikasturterako 1.147 leku izanen dira, Donibanen eraikiko duten haur-eskolari esker; leku guztien % 31 euskaraz eskainiko dira.