Objektu Galduen Bulegora 2.000 elementu, objektu edo tresna inguru iritsi dira. Zehazki, 1.994 objektu zenbatu dira. Horietatik guztietatik, 294 ( % 14,7) jabeei itzuli zaizkie dagoeneko; 912 kasutan ( % 45,7), jabea aurkitu dute eta noiz jasoko zain daude, eta oraindik 788 objektu geratzen dira (ia % 40), jabe jakinik gabe, oraingoz.
Objektu Galduen Bulegoan ia denetarik aurki daiteke, nahiz eta mota guztietako dokumentazioa, poltsak, motxilak, diru-zorroak, telefono mugikorrak edo betaurrekoak diren gehien jaso direnak. 864 objektu, % 40, dokumentazioarekin lotuta daude, batez ere NANarekin (522), kreditu-txartelekin (108), gidabaimenarekin (87) edo atzerritarren NANarekin (33). Gehien galdutakoak diru-zorroak dira, 705 (guztizkoaren % 35). 48 diru-zorro, 35 poltsa, 22 motxila eta 22 giltzurrun-zorro ere jaso dira, baita 20 betaurreko, 10 bitxi, 9 arropa-jantzi eta aterki bat ere.
Teknologiari eta telefono mugikorrei dagokienez, 109 iPhone erregistratu dira bulegoan, eta beste marka batzuetako 123. Horietatik laurden bat itzuli dituzte dagoeneko. Telefono mugikorren kasuan, horiek berreskuratu ahal izateko, enbalajearen kutxa eta bertan datorren IMEI zenbakia (15 zifra) aurkeztu behar dira, edo bestela telefonoa desblokeatu. Objektu Galduen Bulegora iritsi diren gauza bitxien artean gurpil-aulki bat, audifonoak, taka-taka bat edo erosketa-orga bat aurki daitezke. Besaulki bat, ibilgailu baten matrikula-plaka, sendagaiak edo neurketa-laser bat ere badaude.
Objekturen bat galdu dutenek Objektu Galduen Bulegora jo dezakete. Bulego hori Iratxeko Monasterioaren kaleko 2. zenbakian dago, Iruñeko Udaleko Herritarren Segurtasuneko Alorreko bulegoetan. Bulegoa 24 orduz egoten da zabalik sanferminetan, eta, jai-egunetatik kanpo, astelehenetik ostiralera ematen du zerbitzua, 08:30etik 14:30era.
Babes Zibileko Tokiko Batzordearen gaurko bilera aurrez aurre egin den sanferminetako azkena izan da. Jaietako azken orduak aztertu dira. Normaltasunaren barruan doaz, gorabehera aipagarririk gabe eta jende asko dabil hiriko kaleetan, baina asteburuko kopuruetara iritsi gabe.