Nafar Ateneoak, Iruñeko Udalarekin lankidetzan, Euskal pilotak Iruñean izandako historia bisita gidatua antolatu du bihar, ekainak 17 (asteazkena), eta Javier Mangado Urdániz idazle eta hizlaria arituko da gidari-lanetan. Bisita bi txandatan eginen da, 16:00etan eta 18:00etan, eta txanda bakoitzean gehienez ere 25 lagunek parte hartzen ahalko dute. Izen-ematea doan da eta euskera@ateneonavarro.es helbide elektronikoan egin behar da. Oraingoan, Nafarroako Parlamentuaren sarrera izanen da topagunea.
Bisita Nafar Ateneoak Iruñeko Udalarekin lankidetzan antolatutako bisita gidatuen programaren barruan dago, ekaineko lehen hiru asteazkenetan hiriaren historia, hirigintza eta kultura berraurkitzeko xedez. Ibilaldi horrekin zikloari amaiera ematea aurreikusten zen, baina aurreko bisita –Sorgin-ehizaren garaiko Iruña–, bete egin zenez, itxaron-zerrenda osatu behar izan zen, eta hori dela eta, datorren asteazkenean, ekainak 24, berriz eginen da 16:00etatik 18:00etara, interesa duten guztiek ekimenaz goza dezaten.
Euskal pilotarekin lotutako historia
Iruñeak eta euskal pilotak hautsi ezin daitekeen lotura historikoa partekatzen dute Erdi Aroaz geroztik, eta lotura horrek euskal pilotaren kultura- eta kirol-gune nagusietako bat bihurtu du hiria. Nafarroako hiriburuak kirol horren erregistro dokumentatu zaharrena du, eta hori gutxi balitz, hiri- eta gizarte-bilbadurak pilotaren inguruan eboluzionatu du. Testuinguru horretan, ibilaldi gidatua XIX. eta XX. mendeetan pilotan jolastu izan den lekuetan barna ibiliko da. Horien artean, Zabalgunearen hasiera, Kale Berria, Sarasate pasealekuaren ingurua eta Judutegi zaharra. Gainera, horiek guztiak erremonteak berezko modalitate gisa izandako garapenaren lekuko izan dira.
Javier Mangado Urdániz iruindarrak gidatuko du bisita. Biologia-zientzietan graduatu zen Nafarroako Unibertsitatean, eta fisika eta kimikako irakasle aritu da Iruñeko hainbat institututan. Betidanik izan du lotura hiriko kultur bizitzarekin, eta Iruñeko Udaleko dantzari-taldearen eta Erraldoi eta Buruhandien Konpartsaren kide izan da. Gaur egun Iruñeko Katedraleko ezkiljotzaileen taldean dago.
Javier Mangadok liburuak idatzi eta itzuli ditu hainbat argitalpen kolektibotan, eta zenbait literatura-sari jaso ditu horregatik. Halaber, elkarlanean aritu da hainbat aldizkari eta komunikabiderekin, gehienak euskaldunak. Plaza de Toros de Pamplona. 100 años a sol y sombra (Iruñeko zezen-plaza. 100 urte eguzki eta itzal artean) da bere libururik ezagunena, eta zezen-plazaren historia irudiztatua birpasatzen du bertan.
IBILALDI GIDATUAK EUSKARAZ
Ekainak 17, asteazkena. 16:00 eta 18:00. Parlamentuaren sarreran.
Euskal pilotak Iruñean izandako historia. Gidaria: Javier Mangado Urdániz
Izen-ematea, doan, euskera@ateneonavarro.es helbide elektronikora idatzita.
Ekainak 24, asteazkena. 16:00 eta 18:00. Udaletxe plaza.
Sorgin-ehizaren garaiko Iruña. Gidaria: Leire San Martín Marcos
Izen-ematea, doan, euskera@ateneonavarro.es helbide elektronikora idatzita.