Iruñeko Udalak, egungo legeak betez, Zabalguneko Barne Berrikuntzarako Plan Berezia (BBPB) bitan banatzea aurreikusi du, hartara bi dokumentu sortuta: batean, Lehen Zabalguneko hirigintza plangintza jasoko da, eta bestean, Bigarren Zabalgunekoa. Funtsean, lantzen ari den proposamenak jasotzen duena zera da: Lehen Zabalgunea Babes Plan batez hornitzea -Alde Zaharrekoaren antzekoa-, modu horretan betez Vianako Printzea Erakundearen errekerimendua, zeinaren arabera Iruñeko erdigune historikoarengan eragina duen Multzo Historiko-Artistikoaren mugen barruan kokatzen baita Lehen Zabalgunea. Bigarren Zabalguneari dagokionez, barne erregulazioa errealitate eta araudi berriei egokitzearen alde egiten da, batez ere etxebizitzen irisgarritasuna, energia-eraginkortasuna, ekipamenduak, hirugarren sektoreko jarduna, mugikortasuna eta garraioa aintzat hartuta.
Hala, arlo bakoitzak plan berezi propioa izatea proposatu da, eta horien idazketa bi laguntza tekniko ezberdinen kontratazioaren bidez artikulatuko da; hots,erregulazio esparru bakoitzerako, bana. Agiri bat zein bestea idazteaz arduratzen denak, betiere Hirigintza Gerentziaren gainbegiratuarekin, gainera, prozesu partizipatibo bat proposatu beharko du, idatzitako agirien gainean auzotarrek eta Zabalgune bakoitzari lotutako elkarte-, merkataritza- zein kultur-ehunak iritzia emateko eta hobekuntza proposamenak egiteko aukera izan dezaten bermatzeko.