Buztintxuriko Auzo-eztabaidagunea asteartean eginen da, 18:30ean, Buztintxuri IPn, eta bertan izanen dira Borja Izaguirre auzoko zinegotzia eta udal-teknikariak. Saioa irekia izanen da auzoko bizilagunek, erakunde eta elkarteen ordezkariek eta interesa duen publikoak, oro har, parte hartu ahal dezaten.
Saioa aurrez aurre eta streaming bidez jarraitzen ahalko da, www.pamplona.es/eu udal-webgunearen eta Udalaren Youtubeko kanalaren bidez. Bertaratzerik ez dutenek online parte hartzen ahalko dute, emanaldiaren kanaleko txataren bidez. Joan den ostegunera arte proposamenak, iruzkinak eta iradokizunak bidaltzeko aukera izan zen Erabaki Iruña plataformaren eta foros@pamplona.es posta elektronikoaren bidez. Jasotako ekarpen guztiak Auzo-eztabaidagunean zehar aztertuko dira.
Sare sozialetarako traolak #ForoBuztintxuri eta #BuztintxurikoEztabaidagunea dira Saioak entzumen irisgarritasuneko zerbitzua izanen du: zeinu-hizkuntzako interpreteak, azpitituluak eta begizta magnetikoa, aparatuak edo inplanteak dituztenendako. Kontziliazioa errazteko, eztabaidaguneek egin bitartean haurrak zaintzeko zerbitzu bat dute hezkidetza irizpideekin. Informazio osagarria lortzeko, Herritarren Partaidetzako Zentroarekin harremanetan jartzeko aukera dago, 948420266 telefonoaren bidez edo foros@pamplona.es helbide elektronikoan.
Iruñeko Udalaren Herritarren Partaidetza arautzen duen Erregelamenduaren arabera, Auzo-eztabaidagunea “auzoak parte hartzerako duen organo irekia da, eta auzoko gizarte- eta ekonomia-ehuna osatzen duten kolektibo guztiek, herritar aktiboek eta herritarrek, oro har, parte hartzen dute bertan”. Lehen-lehenik, zinegotziak auzorako ekintzak eta proposamenak aurkeztuko ditu, eta, ondoren, udal-teknikariek intereseko eta/edo gaurkotasuneko proiektuak edo programak azalduko dituzte. Ondoren, parte hartzeko txanda irekiko da, bertaratutakoei hitza eman eta posta elektroniko bidez eta online eginiko kontsultei erantzuteko.
BUZTINTXURIKO AUZO-EZTABAIDAGUNEA. 18:30
- Otsailak 27, asteartea. Buztintxuri IP
- Traolak: #ForoBuztintxuri #BuztintxurikoEztabaidagunea