Bederatzi urte dira jada Gaztediaren Etxeak 12 eta 30 urte bitarteko gazteendako Iruñeko uda "esperientzia-txartel" bihurtzen duenetik. Hamaika plan programa uztailaren 16tik abuztuaren amaierara bitarte eginen da aurten eta arratsaldero jarduera, lantegi eta kirol- edo dantza-saioak eskainiko ditu. 2025eko proposamena doako 31 jarduerez osatuta dago, eta bihar arratsaldean abiatuko dira, collage autobiografikoak (irudimentsuak ala ez) sortzeko lantegiarekin, Beatriz Molina diseinatzaile-grafiko eta oihal-diseinatzailearen eskutik. Hamaika plan programa osatzen duten jarduerak doan dira, ez dago aurrez izena eman beharrik, eta 19:00etatik 21:00etara eginen dira profesionalen eskutik.
Irakasleak eskaintzen diren diziplinak bezain askotarikoak dira. Dantza-modalitate desberdinak Gaztediaren Etxeko ohiko irakasleek emanen dituzte, hala nola, Abel Silvak, Keneu Ausserladscheiderek, Nerea Bonitok, Pablo Guerrak, Paula Pedrosok, Nekane Itoizek, Tatiana Gonzálezek, Elycelia Mendozak eta Josune Castellotek. Halaber, Nerea Bonito, Ana Lizarbe eta Carlota de Miguel irakasleek emanen dituzte gorputz-adierazpenarekin lotutako saioak, hau da, antzerkia, antzerki-musikala eta kantu modernoa.
Hamaika plan programan beste gaitasun batzuk ere lantzen dira, hala nola eskulanak, hainbat emakumeren eskutik: Amaia López Gaztediaren Etxeko Moda Diseinuko ikastaroko irakaslea, Beatriz Molina diseinatzaile grafiko eta oihal-diseinatzailea, Lukene Pinzolas, Eskultura Tekniketako Arte Plastiko eta Diseinuko goi mailako teknikaria, eta Garazi Valluerca, artean graduatua; osagai naturalak osasunerako eta edergintzarako erabiltzea, José Antonio Vidaurre, sendabelarretako, kosmetika naturaleko eta masajeko irakaslearen eskutik edo autozainketa psikologikoa Idoia Ángel, Gaztediaren Etxeko Aholkularitza Psikologikoaren arduradunaren eskutik. Irudiari eta teknologiari buruzko lantegiak Legardi de Falcón Gaztediaren Etxeko argazkilaritza-irakaslearen esku egonen dira.
Hamaika plan 12 eta 30 urte bitarteko gazteei zuzendutako udako programa da. Helburu nagusia aisiako eta garapen pertsonaleko jarduerak eskaintzea da, doan, modu irisgarrian eta aurrez izena eman behar gabe. Hiritik irten gabe oporrak modu dibertigarrian pasatzeko modu bat da, bai eta Gaztediaren Etxeak eskaintzen dituen jarduera eta zerbitzuak gazteen artean hedatu eta hiriko gazteenak udal- baliabideetara erakartzeko ere. Iaz proposatutako 32 jardueretan 500 pertsona inguruk parte hartu zuten.
Sanferminen ondorengo astean, bihar collageak egiteaz gain, beste bi hitzordu daude aurreikusita. Uztailaren 17an, ostegunarekin, abiatuko da lehenengo dantza-saioa: Hip Hopa, Abel Silva Gaztediaren Etxeko dantza-irakaslearen eskutik. Uztailaren 18a, ostiralarekin, autozainketarako arratsaldea izanen da eta ezpainetako baltsamoa eginen dute modu naturalean. Lantegia José Antonio Vidaurre, sendabelarretako, kosmetika naturaleko eta masajeko irakasleak emanen du. Udan zehar, astelehenetik ostiralera, jaiegunak salbu, eskulanak, diseinu pertsonalizatuak, munduko dantzak, antzerkia, teknologia, kantua eta produktuak sortzeko lantegiak antolatu dira.
HAMAIKA PLAN. ASTELEHENETIK OSTIRALERA, 19:00ETATIK 20:30ERA. DOAN
Uztailak 16, asteazkena
Sortu zure abentura collagean
Beatriz Molina Barandalla, diseinatzaile grafikoa eta oihal-diseinatzailea
Uztailak 17, osteguna
Hip Hopa
Abel Silva, Gaztediaren Etxeko Hip Hop eta Comercial Dance estiloetako irakaslea
Uztailak 18, ostirala
Ezpainetako baltsamoa
José Antonio Vidaurre, sendabelarretako, kosmetika naturaleko eta masajeko irakaslea
Uztailak 21, astelehena
Eskuetako krema konpontzailea
José Antonio Vidaurre. Sendabelarretako, kosmetika naturaleko eta masajeko irakaslea
Uztailak 22, asteartea
Afrodancea
Keneu Ausserladscheider, Gaztediaren Etxeko Afrodance- eta Dancehall-irakaslea
Uztailak 23, asteazkena
Vogue
Pablo Guerra, dantzaria eta koreografoa
Uztailak 24, osteguna
Comercial Dance
Abel Silva, Gaztediaren Etxeko Hip Hop eta Comercial Dance estiloetako irakaslea
Uztailak 28, astelehena
Ezagutu inguruetako sendabelarrak
José Antonio Vidaurre. Sendabelarretako, kosmetika naturaleko eta masajeko irakaslea da
Uztailak 29, asteartea
Dancehall
Keneu Ausserladscheider, Gaztediaren Etxeko Afrodance- eta Dancehall-irakaslea
Uztailak 30, asteazkena
Emozioak eta sentimenduak kudeatzeko tresnak (euskaraz)
Idoia Ángel, Gaztediaren Etxeko Aholkularitza Psikologikoaren arduraduna
Uztailak 31, osteguna
Mugikorraren bidez bideo motzak sortzea
Legardi de Falcón, Gaztediaren Etxeko argazkilaritza-irakaslea