Bizilabe programako 53 neska-mutil IRIS - Nafarroako Berrikuntza Digitalaren Poloaren egoitza bisitatzen ari dira egun hauetan, Nafarroako Unibertsitate Publikoko (NUP) Sario eraikinean. Bisitaren bidez zientzia eta teknologiarekiko interesa sustatu nahi da, ikasleek ikuspegi orokorra izan dezaten zentroak lankidetza, esperimentazio eta transferentzia teknologikoko gune gisa duen eginkizunari buruz.
Ibilbidea Bizilabe metodologiaren parte da, zeinaren bidez neska-mutilek ikertu eta asmatzen baitute ikasturte honetan, jolas eta esperimentuen eta mentoretzen eta tokiko enpresetara eta proiektuetara egindako bisiten bidez, zientzian eta teknologiak adituak diren orientatzaileek lagunduta. 2025/2026ko programan 10 eta 14 urte bitarteko ikasle gazteek parte hartzen dute (Lehen Hezkuntzako azken ziklokoak eta DBHko lehen ziklokoak).
Gaur arratsaldean, taldearekin batera Mikel Armendáriz Barnechea Berrikuntzako eta Gazteriako Alorreko zinegotzi ordezkaria izanen da, hala egin zuen atzo euskarako taldearekin ere Carlos Andrés Uranga alor bereko zuzendariak. Bisitak Juan Narro Ríosek eta Ana González Sánchezek gidatu dituzte, hurrenez hurren. Halaber, Elhuyarreko Joseba Aldasoro Galán, Saioa Aranburu Etxezarreta eta Maider Vallo Lerendegi izanen dira bi bisitetan. Elhuyarrek zientzia, teknologia eta euskararen erabilera sustatzeko lanean dihardu 1972az geroztik.
Bisitak co-work eremuan abiatzen dira. Bertan, enpresen, startupen, ezagutza-eragileen eta administrazio publikoen arteko lankidetza-lanaren eredua azaltzen da. Gero, laborategi digitalera doaz, teknologia aurreratua erakutsi eta frogatzera bideratuta, hala nola digitalizazioa, datuen erabilera eta hainbat sektoretan aplikatutako adimen artifiziala. Ondoren, bisitak laborategi zientifikoak ditu ardatz, sekuentziazio genomikoko laborategia, biologia molekularreko laborategia eta biologia sintetikoko laborategia barne. Bertan, zentroak analisi genetikorako, ikerketa aplikaturako eta irtenbide bioteknologiko berritzaileen garapenerako dituen azpiegiturak, ekipamenduak eta gaitasunak aurkezten dira, eta osasunean, nekazaritzako elikagaietan eta jasangarritasunean duen eragina nabarmentzen da.
Bizilabe programak gazteen artean zientzia eta teknologiarekiko interesa sustatzea du helburu, eta modu irisgarrian lortu nahi du helburu hori, proiektu zientifikoak eta teknologikoak garatzeari esker. Halaber, xedea da pentsamendu kritikoa bultzatzea eta estereotipo okerrak atzean uztea, egoera sozioekonomikoaren eta generoaren araberako aukera-berdintasuna bermatzeko faktorea baita. Hainbat ikerketaren arabera, Bizilabe programaren tankerako proposamen zientifiko goiztiarrek eragin nabaria izaten ahal dute kultur estereotipoetan eta gazteen etorkizuneko aukeretan. Programan kontuan hartu dute nesken presentzia oso urria dela STEM diziplinetan. Bizilabe programan 2.000 gazte inguruk parte hartzen dute urtero, eta Bilbon, Elgoibarren, Abanton eta Laudion eskaintzen dute gaur egun, udalerri horietako udaletxeekin elkarlanean.
Lehen Hezkuntzako 5. eta 6. mailako eta DBHko 1. eta 2. mailako taldeetan 25 lagunek parte hartzen dute, 13 neskek eta 12 mutilek: jarduera astelehenetan egiten dute, euskaraz, eta atzo bisitatu zuten gunea. Honako ikastetxe hauetakoak dira: Patxi Larrainzar IP, San Fermin Ikastola, Bernat Etxepare IP, Paz de Ziganda Ikastola, San Frantzisko IP, Hegoalde IP, eta Elorri IP (Lehen Hezkuntza) eta Biurdana (DBH).
Gaztelaniako Lehen eta Bigarren Hezkuntzako taldeak gaur arratsaldean bertaratuko dira eta 28 parte-hartzailek osatzen dituzte (9 neskek eta 19 mutilek). Honako ikastetxe hauetan ikasten dute: La Compasión-Escolapios, Mendialdea, Cardenal Ilundain, Colegio Miravalles - El Redin ikastetxea, Vedruna ikastetxea, El Lago de Mendillorri BHI, Azpilagaña IP, San Fermin Ikastola, Teresianas eta Buztintxuri IP (Lehen Hezkuntza) eta Biurdana BHI, Plaza de la Cruz BHI, Irabia ikastetxea, La Presentación ikastetxea, Irubide-Padre Moret ikastetxea, Escolapios-Calasanz ikastetxea, Vedruna ikastetxea, San Fermin Ikastola, eta Navarro Villoslada BHI (DBH).