Bertako artisau-produktuen azokaren beste edizio bat eginen dute larunbatean Basotxoan. Guztira Iruñeko zein Nafarroako artisauen nekazaritzako elikagai eta lanbideen 30 postu egonen dira: 10:00etatik 14:00etara bitarte euren produktuak eskainiko dituzte. Azoka egiten den bakoitzean denboraldiko produktu bati eskaintzen zaio jardunaldia eta larunbat honetan bi hauen txanda izanen da: zainzuri eta orburu freskoak; hori dela eta, Iñigo Azcona Oteizakoa eta Puente Viejo Caparrosokoa gonbidatu dituzte.
Merkatua jende orori zabalik dago, eta bertan askotariko produktuak eskuratzen ahal dira, hala nola gaztak, eztia, olioa, lekaleak, meloi ekologikoak, eskuz egindako bitxiak, serigrafia artistikoa, arropa organikoa, grabatuak eta kakorratz-lanak. Eskaintzen diren produktu guztiek dagozkien kalitate-zigiluak eta ziurtagiri ofizialak dituzte. Postuak edizio batetik bestera txandakatzen dira, eta, beraz, gutxienez % 25 berriak izanen dira.
Tokiko artisau-produktuen azoka hilabete bakoitzeko bigarren larunbatean egiten da, eta Iruñeko Udalak antolatzen du, beste erakunde hauekin elkarlanean: Nafarroako Nekazaritzako Elikagaien Teknologien eta Azpiegituren Institutuarekin (INTIA-Reyno Gourmet), Nafarroako Nekazal Produkzio Ekologikoaren Kontseiluarekin (CEPAEN-NNPEK), Nafarroako Elikagai Artisauen Ekoizleen Elkartearekin eta Bizilur elkartearekin.
Postuetako karpak eta mahaiak eskuratzeko, 72.000 euroko inbertsioa egin zuen Iruñeko Udalak eta martxoan erabili zituzten lehen aldiz. Karpek honako neurri hauek dituzte: 3 metro zabal eta 3 metro sakon eta altuera doigarria (3,3 metrokoa da estalkiaren erdiko puntuan eta karparen garaiera minimoa 2 metrokoa da perimetro osoan). Guneari batasuna emate aldera, erakusmahai guztiak berdinak dira, baita karpak ere.
Ekimena SF365 Helmugako Jasangarritasun Turistikoko Planaren parte da, eta Europar Batasunak osorik finantzatu du Next Generation EU funtsen bidez. Funts hori Espainiako Gobernuaren Berreskuratze, Eraldatze eta Erresilientzia Planaren C14.I1 inbertsioaren finantza-tresna da. Testuinguru horretan, Iruñeak 5.492.500 euroko laguntza jaso du hiru urtean, zenbateko hori "Iruña SF365” Helmugako Jasangarritasun Turistikoko Plana hedatu eta garatzen erabiltzeko. Plan horrek 13 jarduketatan egituratzen diren lau gai ditu ardatz: trantsizio berde eta jasangarria, energia-efizientzia hobetzea, trantsizio digitala eta lehiakortasuna.
BASOTXOA, BERTAKO ARTISAU-PRODUKTUEN AZOKA. APIRILAK 11 (LARUNBATA). 10:00 – 14:00
Parte hartzen duten bertako 30 ekoizleak (izena, herria eta kategoria)
Atekoa. Iragi. Gazta
Pirineki. Aurizberri. Gazta
Bikain. Etxarri Larraun. Gazta
Miel Andiaga. Uxue. Eztia
Elkea. Bakedao. Olioa, lekaleak.
Guneko. San Martín Unx. Arrautzak
Sustrai. Uharte Arakil. Gazta, hestebeteak
Loperena. Egozkue. Gazta
Gorritz. Leitza. Gazta
Txantrea Gaztandegia. Txantrea. Gazta
Lorez lore. Berriozar. Eztia
Iñigo Azcona. Oteiza. Zainzuriak
Lakabe. Lakabe. Ogia
El puente viejo. Caparroso Barazkiak
Allotarra elkartea. Allo. Askotarikoak
Gukalde kontserbak. Artieda. Kontserbak eta marmelada
Ekosagar. Oskotz. Zukuak
Afortunato. Iruña. Kafea
Virgen de Ujué gozokiak. Uxue. Gozokiak
Cascanteko Monasterioa. Cascante. Gozokiak
Irular. Irurita. Marmeladak
Katealde. Altsasu. Ahatea
Nafarroako txokolateak. Aitzoain. Gozokiak
Baigorri eztia. Zangoza. Eztia
El Gantxillo de Mari. Agoitz. Artisau-lanbidea: kakorratz-lana
Herbaria. Saragueta. Artisau-lanbidea: lore lehorrak
Mikene. Arizkun. Artisau-lanbidea
Nineuk.art. Iruña. Artisau-lanbidea: artisau-teknika grafikoak
Aziza Puch Seda Pintada. Meano. Artisau-lanbidea: ehungintza
Hermanos Orta artisautza. Cascante. Artisau-lanbidea: olibondo- eta ezpel-egurra
