Asteazkenean Ziudadelako Arma Aretoan Don Inorrez taldearen kontzertua izanen da, Hiriartea Kultura Garaikideko Zentroak iraila-abendua lauhilekorako antolatutako programazioaren barruan. Don Inorrez taldeak, Bide Ertzean aritu zen Imanol Ubedaren taldeak, Dardara hura lan diskografiko berria aurkeztuko du 19:30ean hasiko den emanaldi batean, sarrera librea izanen delarik.
2016. urtearen amaieran, Bide Ertzean talde tolosarrak atseden luzea iragarri zuen. Orduantxe jaio zen Don Inorrez, Imanol Ubedaren bakarkako proiektua, hain zuzen ere izena hartuta Bide Ertzean taldearen zortzigarren diskoaren izenburutik. Don Inorrez taldeak 2018ko udaberrian egin zuen estreinaldia, Mugiro bila izenburuko diskoaz. Lehen abestiak erregistratzeko El Puerto de Santa Maríaraino (Cádiz) bidaiatu zuten. Hor, Paco Loco indie-ekoizle ezagunaren eskutik, proiektu berria taxutu zuten; eta orain berriro ere aritu dira elkarlanean, bihar Arma Aretoan aurkeztuko den diskoa ere taxutzeko. Don Inorrez taldeak Bide Ertzean taldearen musika-pultsuari eusten dio, baina antz handiagoa dauka Peiremans+ proiektuaren power-poparekin (Imanol Úbedak eta Gorka Urbizu BTX-k abiatua).
Dardara hura lan berrian, 7 hazbeteko binilozko singlean, abesti berriek new amerikarra delakoaren ukitu handiagoa dute. Pello Lizarralde idazleak idatzitako hitzak dituzte oinarri abestiek. Azala José Ignacio Agorreta margolari nafarraren lana da. Etapa berri honetan, Imanol Úbedaren ahots eta gitarrarekin batera, aurreko biran parte hartu zuten musikari berberek jotzen dute: Karlos Arancegui bateria-jotzailea, Fernando Neira baxu-jotzailea eta Rubén Caballero gitarra-jotzailea.
Hiriarteak, Iruñeko Ziudadelako Kultura Garaikideko Zentroak, hainbat ekitaldi antolatzen ditu, erakusketez gain, arte-kontzeptuan sakondu nahi dutenendako arte-esperientzia eta bizipen berrien bila. Horregatik eskaintzen dira musika kontzertu hau eta bestelako ekimenak, programa ezberdinen barruan, irailetik abendura arte. Lauhileko honetan, honako hauek dira gonbidatutako artistak: Don Inorrez bera, Zarys Falcon (Arma Aretoan urriaren 31n) eta Harkaitz Cano (abenduaren 14an Santos Bregañaren Axerizulo erakusketan barnako bisita esperimentala). Hiriartearen programazio osoa www.pamplona.es eta www.pamplonaescultura.es webguneetan ikus daiteke.