Hasi dira bigarren faseko lanak Arantzadi parkean, ibaiaren meandroko 17.000 m2 berrantolatuko dituen berdegunean, eta atsedenguneak sortu eta inguratzen duen hiri finkatuko oinezkoen eta bizikletendako loturak hobetuko dira. Fase hau amaitzean, 2022. urtearen amaieran, Arrotxapea eta Txantrea lotzen dituen elkargunean, garaiaren inguruan, erdiko plaza batez gozatzeko aukera izanen da, zeinak atsedengune eta topaketa-eremu bat sortuko baitu, tamaina handiko zuhaitz-espezie berriek itzaleztatutakoa, banku, hiri-altzari eta ur-jolasekin batera.
Halaber, fase honetan, ur-goraldiko basoko hegoaldeko bidea argiztatu eta zolatuko da, eta hainbat gunetan basogune batzuk sortuko dira. Uholdeei aurre egiteko araudiaren ikuspegitik, sarrerako ezpaina birjarri eta ur-goraldiko basoaren zaldainak konpondu eta irazgaiztuko dira. Obras Especiales Edificación e Infraestructuras enpresari esleitutako obra horrek guztiak 2,02 milioi euroko inbertsioa behar du. Une hauetan fase horren bigarren partea lizitatzen ari da, zehazki lorezaintzari eta gune horiek ureztatzeari dagokiona. Obraren zuzendaritza, kasu honetan bigarren faseko bi loteena, PJS Proyectos, estudios y servicios técnicos de Navarra SA (SERTECNA) enpresa egiten ari da, 30.076 euroan, eta, zehazki, 27.491 gauzatzen ari den loteari dagozkio.
Parkeak, behin amaituta, guztira 150.000 m2-ko azalera izanen du. 2008an ideia-lehiaketa baten bidez hasi zen proiektu horrek esku-hartzearen lehen fase bat behar izan zuen, antolamendutik kanpoko eraikinak eraitsi eta ibaitik hurbilen dagoen zirkuluerdian (baratze-orla, ur-bazterreko orla, ur-goraldiko basoa) eta barruko bideetan lan eginez, eta 2013an amaitu zen. Orain, jarduketak beste lotura-bide batzuetan eta meandroaren barrualdean egiten dira.
Orotara, parkearen diseinuak eta etorkizuneko zuzkidurek kontuan hartzen dute arlo teknikoan kontzeptu hirukoitz bat praktikan jartzea: jasangarritasuna eta ingurumen-hezkuntza bultzatzea, espazio horren erabilera tradizionalei balioa ematea eta ekonomia zirkularra sustatzea baliabide naturalen eta energiaren erabilera txikiagotzen duen ekoizpen-eredu gisa.