Alde Zaharrera zein hiriko erdigunera sartzeko bideak berriz irekiko dira astelehenean, 14:00ak inguruan, sanferminetako zirkulazio-mugen ostean

Iruñea ohiko normaltasunera itzuliko da zirkulazioari dagokionez uztailaren 15ean, astelehena, 14:00ak aldera. Aurreikuspenen arabera, orduan amaituko dira sanferminak direla eta Alde Zaharreko sarreretan eta Lehen Zabalguneko eta Bigarren Zabalgunearen zati bateko zirkulazioan eta sarbideetan ezarritako mugak.

San Domingoko eta Labriteko aldapetatik eta Gipuzkoako etorbidetik Alde Zaharrera sartzeko bideak zirkulaziorako irekiko dira eta berriz zirkulatu ahal izanen da Armada etorbideak, Nafarroa Behereko etorbideak eta Oliveto Kondearen etorbideak eta 1. sektoreak (Alde Zaharra) mugatzen duten eremuan, bai eta Julián Arteaga, Sandoval eta Navas de Tolosa kaleetan eta Larraina elkartearen ondoko bidean. Zezen-plazaren inguruak, San Domingoko baratzek, Frantziako portaleak, Santa María La Realek edo Labriteko eremuak beren ohiko fisionomia eta sarbideak berreskuratuko dituzte.

Logikoa denez, debekutik salbuetsita zeuden Iruñerriko Mankomunitateko hiri-garraioa, lanean ari ziren taxiak, polizia-ibilgailuak, anbulantziak, suhiltzaile-parkeko eta beste udal-zerbitzuetako ibilgailuak, bai eta Udaltzaingoaren berariazko eta baimen idatzia zutenak ere.

Murrizketak eta beste espazio batzuk berriz irekitzea
Hiriaren erdigunea zirkulaziorako irekitzearekin batera Alde Zaharrean eta Arantzadi parkean sarbide- eta zirkulazio-kontrola berriz martxan jarriko da, sanferminetako geldiunearen ostean. Bi gune horietan, bertatik igarotzen diren ibilgailuak zaindu eta erregistratzeko kamera batzuk daude, eta zirkulatzeko baimenik ez dutenak edo zirkulatzeko ezarritako denbora-tarteak betetzen ez dituztenak zehatzen dira.

Festen eta zirkulazioaren murrizketen amaierak egun hauetako berezitasun batzuen amaiera dakarte berekin. Adibidez, sanferminetan 1. sektoreko (Alde Zaharra) eta 8. sektoreko (Arrotxapea) bizilagunendako murriztuta egon den Gaseko eskorten ondoko aparkalekua edonorentzat egonen da erabilgarri, espazio horretan ohikoa den eremu laranjako tasa ordainduta. Feria-lekuak hartzen duen Runa parkeko aparkalekua soilik geldituko da ireki gabe, 1. sektoreko (Alde Zaharra) bizilagunendako eskuragarri egonen dena atrakzioak desmuntatu eta espazioa txukuntzen denean.

Ziudadelako sarbidea ere itxita egonen da, ziurrenik, uztailaren 20ra arte. Egun horietan, su artifizialen azken bilduma jaurti ondoren, garbiketa-lanak egin eta hondakin piroteknikoak kendu beharko dira, bai eta eremua leheneratu eta belardiak egokitu eta bertan mantentze-lanak egin ere. Ziudadela irekitzen denean bertako bideetatik eta barneko espazioetatik ibili eta erakusketa-aretoetan sartzen ahalko da.