43.000 euro bideratu dituzte Salestarren ikastetxe ohian dagoen Txantreako zentro komunitarioko leihoak aldatzeko

43.000 euro bideratu dituzte Salestarren ikastetxe ohian dagoen Txantreako zentro komunitarioko leihoak aldatzeko
Guztira, 32 leiho aldatu dituzte, eraikineko lehen solairuan eta behekoan, non auzo-unitatea baitago
centro comunitario de la Txantrea



Iruñeko Udalak 43.620,52 euro bideratu ditu guztira Salestarren eraikin ohian (Iruñerria kalean) dagoen Txantreako zentro komunitarioko kanpo-arotzeriak aldatzeko. Beheko solairuko eta lehen solairuko 32 leiho zaharberritu dituzte guztira. Eraikin hau auzoan eraiki zen lehenetarikoa da, eta oraindik ere bazituen zurezko arotzeriak, egoera txarrean eta arauz kanpokoak; hori dela eta, Udalak erabaki zuen horien ordez PVCkoak paratzea, konforta eta energia-aurrezkia handitze aldera. 

Zehazki, beheko solairuko 18 leiho aldatu dituzte (eraikinaren eskuin aldekoak), eta lehen solairuko 14 (fatxadan). Horietatik, 27k bi orri dituzte; bik bi orri eta kristal finko bat dute, eta hiruk, orri bakarra. Tokiko Gobernu Batzarraren azken saioan onetsi dute lan hauek ordaintzeko gastu-baimena. Lanak Aluminios Tajonar enpresak egin zituen urte bukaeran. 

Auzotarrendako zerbitzu-gunea

Salestarren eraikina erabilera berrietara egokitzeko egin diren azken lanei gehitu behar zaie zaharberritze hau. Izan ere, ikastetxe ohi honetan paratu dira hala zentro komunitarioa nola auzo-unitatea. Azken hori iazko martxoan lekualdatu zuten eraikinaren beheko solairuko ezkerreko aldera. Aurretik, xede horretara bideratuta zegoen gunean zaharberritze-lan handiak egin zituzten.
 
Garai hartan egin ziren lanek 325.127 euroko aurrekontua zuten, eta haietan hamaika bulego, bilera-areto bat eta administrazio-gune bat egin zituzten. Horiez gain, gune horretako kanpo-arotzeriak aldatu zituzten, bai eta trenkada-multzoak, sabai aizunak eta instalazioak, berogailua, esaterako. Horregatik hori guztia ez dute ukitu oraingo zaharberritzean.

Eraikinaren gainerakoan zentro komunitarioa dago, bizitza asoziatiboa eta auzotarren parte-hartze aktiboa sustatzera bideratutako espazioa, zeinetan eremu batzuk ere birgaitu baitituzte. Zehazki, azken bi urteetan milioi erdi euro bideratu dute hainbat zaharberritze-lanetarako, besteak beste, ekitaldi-aretoa indarrean den araudiari egokitzeko eta bertan Udalaren kultur eskaintzaren barruan programatutako jarduerak egin ahal izateko. Halaber, igogailu berria instalatu zuten, eta barruan nahiz kanpoan urbanizatze-lanak egin zituzten arkitektura-oztopoak gainditu eta irisgarritasuna errazte aldera. 

¿Te ha sido útil esta página?