Gaur goizean entzierrorako prest jarriko dituzte Udaletxe plazako, Mercaderes kaleko eta Estafetako bihurguneko galtzada-harriak. Gaur, 23:00etatik aitzina, Pavitec enpresako langileek 1.500 litro produktu irristagaitz barreiatuko dituzte eskuz, zezenek irrist egin ez dezaten eta entzierroetan egoera arriskutsuak gerta ez daitezen. Aipatu moduan, eskuz barreiatuko dute produktua, eta horretarako, ureztagailuak eta erratz handiak erabiliko dituzte, zortzi orduz.
Juan Manuel Gil Larequi, Herritarren Segurtasuneko eta Bizikidetzako Alorreko zuzendariak eta Vicente García Nogueira Pavitec enpresako teknikari arduradunak gainbegiratuko dute lanen hasiera: guztira, enpresako hamar langile arituko dira lanean. San Domingo aldaparen azken zatian (Udalera iritsi baino 10 metro lehenago), Udaletxe plazan, Mercaderes kalean eta Estafeta kaleko lehen 10 metroetan barreiatuko dute produktu irristagaitza. Halaber, gaseko eskorten irteerako hormigoizko zoladura tratatuko dute, entzierrilloaren hasieran zezenek irrist egin ez dezaten. 1.875 metro karratutan botako dute produktua, 0,8 litro metro karratu bakoitzeko.
Likido irristagaitzak bi helburu ditu: ganadua ez erortzea eta zezen-taldea elkarrekin mantentzea; hala, lasterketaren abiadura areagotuko da, baita arriskua murriztu ere. Likido irristagaitzak erreakzio bat eragiten du, eta zoruaren atal silizeoan urtean zehar zikinkeriaren edo garbiketa-makinen leuntzearen ondorioz estalita dauden poroak zabaltzen ditu. Poro horiek ‘bentosa-efektua’ eragiten dute, animalien apatxak hobeto heltzea ahalbidetuz, eta hori bereziki eraginkorra da zorua bustita dagoenean. Iruñeko Udalak 2005ean proba pilotu bat egin zuen disoluzio kimiko irristagaitz batekin, eta urte horretatik aurrera, urtez urte erabili du likidoa. Pavitec enpresak 2006. urtetik egiten ditu produktu kimikoa barreiatzeko lanak. Beste leku hauetan ere egin ditu lanak: Portugalen, Txekian, Belgikan, Hungarian, Qatarren, Dominikar Errepublikan eta Mexikon.