IKASKUNTZA ETA ZERBITZUA
Lehiaketaren xedea da ikaskuntza-zerbitzuko hezkuntza-proiektuak sortu eta abiaraztea Iruñeko ikastetxe publiko eta itunduetan; izan ere, metodologia didaktiko horrek etapa bakoitzeko curriculumean oinarritutako ikaskuntza-prozesuak eta tokiko komunitateari zerbitzua ematekoak uztartzen ditu. Halaber, ikastetxeen gizalegezko konpromiso solidarioa ikusarazi nahi da.
Programa Haur Hezkuntza eta Lehen Hezkuntzako, DBH-Batxilergoko eta Lanbide Heziketako ikastetxeei zuzenduta dago. Hiru kategorietako bakoitzean bi sari ezarri dira. Deialdia NAOn eta Udalaren webgunean argitaratzen da urteko azken hiruhilekoan.
Ikaskuntza-zerbitzuko prestakuntza eskainiko zaie irakasleei ikasturteko lehenengo hilabeteetan, geroago aurkeztuko duten proiektua prestatu ahal izateko. Sari-banaketa urtarrilean eginen da eta, udaberrian, proiektu irabazleen aurkezpena eginen da, proiektuak amaitutakoan.
- Zer da APS?
Ikaskuntza-Zerbitzua komunitateari zerbitzua emanez ikasteko hezkuntza-metodologia da. Gizarte-behar baten aurrean, neska-mutilek komunitatearendako zerbitzu-ekintza bat abiatzen dute, eta horrela ezagutzak, trebetasunak, jarrerak eta gaitasunak praktikan jartzen eta sendotzen laguntzen dute, haien talentuaz baliaturik denon ongizatearen hobe beharrez.
LITERATUR-LEHIAKETA
Lehiaketa hau Udalak antolatzen dituen jarduera-sorta baten barnean kokatzen da, eta honako hauek ditu xede: gure ikasleengan literatura- eta sormen-jarduerekiko zaletasuna piztea, eta hiriko ikasleen adierazpen idatzia hobetu eta sorkuntza sustatzea.
Bizitokia edo ikastetxea Iruñean duten 6 eta 14 urte bitarteko haurrei (Lehen Hezkuntzako eta Bigarren Hezkuntzako Lehen Zikloko ikasleak) zuzenduta dago. Egileek lan bana aurkezten ahalko dute modalitate bakoitzeko. Idazlanek gai librea izanen dute –gaztelaniaz edo euskaraz idatzita–, eta jatorrizkoak eta argitaratu gabeak izan beharko dute. Bi modalitate ezarri dira: ‘Ipuin’ modalitatea, Lehen Hezkuntzako 1. mailako eta DBHko 2. mailako ikasleendako, mailen araberako lau kategoriatan banatuta; eta ‘Komiki’ modalitatea, Lehen Hezkuntzako 5. mailatik DBHko 2. mailara bitarteko ikasleendako, adinen araberako bi kategoriatan banatuta.
Deialdia NAOn eta Udalaren webgunean argitaratzen da urteko lehen hiruhilekoan.
NEGUARI BURUZKO KARTELAK
Lehiaketa Iruñeko ikastetxe publiko eta itunduetako Lehen Hezkuntzako ikasleei zuzenduta dago eta neguaren etorrera eta egun horietako jai eta ospakizunak gogora ekartzea du xede, ikastetxeak eta ikasleak talde- eta hausnarketa-proiektuak sustatzera animatzeko.
5 eta 10 neska-mutil bitarteko taldeetan, kartel bat egin behar dute, negua iristearekin eta urteko azken eta lehen asteetako jaiekin lotutako ideiak azaltzeko. Horrela, data horiek nola bizi dituzten hausnartuz ikastea sustatzen da, baita proiektu bat egitea ere, haurrek modu aktibo eta kontzientean partekatu eta ekarpenak egin ahal izateko.
Deialdia NAOn eta Udalaren webgunean argitaratzen da urteko lehen hiruhilekoan.
