LEÓNGO KATEDRALA
Andre Mariaren omenez, Espainiako estilo gotikoaren paradigma da. Harrizko hormaz hustutako hiru altuerek (arkupea, triforioa eta leihateak) arintasunezko eta dotoretasunezko efektu optikoa eragiten dute. XIII. mendetik XVI. mendera bitarteko jatorrizko beirateak Europan hobekien kontserbatu den multzoetako bat dira. Zerbaitengatik esaten zaio Pulchra Leonina, hau da, Leóngo Ederra.
Donejakue Bideko Udalerrien Elkarteak utzitako irudia
SAN ISIDORO LEÓNGOA
Bidearen beste mugarri bat arkitektura, pintura eta eskultura erromanikoaren bilduma bikaina da. Erregeen panteoia Espainiako Kapera Sixtinotzat hartzen da XII. mendeko freskoengatik. Elizaren nabearen neurriak ia katedral batenak dira. Eta portadetako eta kapiteletako eskulturak kalitate gorenekoak dira, Done Jakueren eskulturen artean.
ÓRBIGOKO ZUBIA
Paso Honroso ere deitua, Bideko Erdi Aroko zubirik luzeena da: 310 metro. Don Suero de Quiñones zaldunaren kondaira dauka lotuta; zaldunak, bere maitearenganako maitasuna erakusteko, borrokatzeko erronka botatzen zion hura gurutzatzera ausartzen ziren guztiei.
Donejakue Bideko Udalerrien Elkarteak utzitako irudia.
ASTORGAKO KATEDRALA
Salamanca eta Segoviakoekin batera, hau da Espainian eraiki zen azken katedral gotikoetako bat. Izan ere, fatxada, dagoeneko errenazentista hutsa da. Harrigarriak dira tenpluko hiru nabeak estaltzen dituzten ganga ugariak eta klaustroaren itxura italiarra.
ASTORGAKO APEZPIKU-JAUREGIA
Jauregi neogotikoa, Antonio Gaudíri enkargatua 1887an, eta 1915ean amaitua. Zuri koloreko granitozko kanpoalde ikusgarriak gaztelu, etxe eta tenplu itxura ematen dio, dena aldi berean. Botines (León) eta El Capricho (Comillas) etxeekin batera, Gaudík Kataluniatik kanpo egin zituen hiru eraikinetako bat da.
Donejakue Bideko Udalerrien Elkarteak utzitako irudia
CASTRILLO DE LOS POLVAZARES
Multzo Historiko-artistiko izendatutako Maragatería eskualdeko herririk adierazgarriena da, bere egoera onari esker. Historikoki, XVIII. mendean bere osperik handiena lortu zuen mandazain-herria izan da, eta, hori horrela, badirudi ez dela denbora igaro bere kaleetan zehar.
PONFERRADAKO GAZTELU TENPLARIOA
Nahiko berreraikita badago ere, Ponferradako gaztelu tenplarioa aurrez erromatarren aurreko kastro bat egon zen lekuan dago. XII. mendearen erdialdean, Tenplarioen Ordenak gaur egun ezagutzen dugun gotorlekua sortzea erabaki zuen. Xedea zen Ponferradan kokagune sendo bat ezartzea, aldi berean Donejakue bidea egiten zuten erromesei harrera egin eta babesa emateko.
Donejakue Bideko Udalerrien Elkarteak utzitako irudia.
VILLAFRANCA DEL BIERZOKO SANTIAGO ELIZA
1186. urteko tenplu erromanikoa da, eta portada bikaina du, Barkamenaren portada izenekoa, ikonografian aberatsa. Kalisto III.a aita santuak ate horretatik igarotzen ziren erromes gaixo edo elbarriei Santiagora iritsi balira bezalako induljentziak ematen zizkien.