SEINALEZTAPENA
Gure egunerokotasunean geolokalizaziorako gailu ugari ditugun arren, modurik tradizionalenak –seinaleak– indarrean dirau. Errespetatu eta jarraitzen badituzu, ez zara galduko eta istripuak ekidinen dituzu.
Urteetan zehar, Bidea igaro den hainbat tokitako seinaleztapena askotarikoa izan arren, erromesen artean nahasteak saiheste aldera, 2018an Done Jakue Kontseiluak ikur-amalgama hura ordenatzea erabaki zuen, gezi horia eta bieira-maskorra Donejakue bidearen ikur ofizial bakarrak bihurtuz.
GEZI HORIA
Gezi horia Donejakue bidearen ikurrik ohikoenetarikoa da, eta bere esanahia oso sinplea da, noranzkoa adierazten baitu. Ingurunea begiratzean despistatu eta bide nagusitik desbideratzen bazara, jarraitu gezi hori horiek eta lehenago edo beranduago berriz bidean egonen zara. Gezi horia aliatu ona da, Donejakue bidearekiko konexioa bermatzen dizu.
ANAGRAMA HORIAK DITUZTEN ZERAMIKA URDINAK
Seinale hori aurkitu baduzu, anagrama horia duen zeramika urdina, hiri edo herri baten barruan zaudela esan nahi du.
Seinale horiek erromesek hiriguneetan zehar egin behar duten ibilbidea markatzen dute.
ZERAMIKAZKO MUGARRIAK
Donejakue bidean aurkitzen ditugun zeramikazko mugarriek lehen ikusi ditugun bi seinaleak uztartzen dituzte: gezi hori bat eta maskorraren anagrama horia duen zeramika urdin bat. Haien lana da erromesak gidatzea bidegurutzeetan eta noranzkoa bat-batean aldatzen denean.
ERREPIDE-SEINALEAK
Errepide-seinaleek adierazten dute oinez joaten ari ginen errepidea atzean utzi eta beste bide batean sartu behar dugula erromesaldiarekin jarraitzeko. Panel urdinak dira eta hondo zurian dagoen ibiltariaren irudiak, maskor horiak eta jarraitu behar den noranzkoa duen gezi batek osatzen dituzte. Ondoren ikusten dugun bigarren seinalea errepideetako bidegurutzeetan erabiltzen da, eta beste zirkulazio-seinale batzuekin edo arriskuaz ohartarazteko seinaleekin batera joaten da.
INFORMAZIO-PANELAK
Informazio-panelak Donejakue bideko herri nagusietara sartzean eta ateratzean aurkituko dituzun taulak dira. Bidearen inguruko argibide eguneratuak, mapak eta gomendioak eskaintzen dituzte. Beste batzuek gai jakin batzuk adierazten dituzte, adibidez, gertuen dauden herrietara dagoen distantzia adieraztea.
IRUÑEKO SEINALEZTAPENA
METALEZKO SEINALEAK
Frantziako bidetik igarotzean Iruña, bidean lehena, zeharkatzen baduzu, lurrean kokatuta eta hiriaren bereizgarri diren metalezko seinale batzuk aurkituko dituzu.
Metalezko seinale horiek hiriaren erdialdetik jarraitu behar duzun ibilbidea adierazten dute, Alde Zaharreko kaleek nahasmena sortzen ahal baitute.
Txirrindulari baten marrazki txiki batekin ere aurki ditzakezu, eta horrek adierazten du Bidea bizikletaz egiten dutenek jarraitu beharreko bidea.
