Bertako merkataritza bultzatzeko zenbait ekimen antolatzen ditu Iruñeko Udalak urtean zehar (sustapenak, azokak, dinamizazio-ekintzak), gehienak hiriko merkataritza- eta zerbitzu-sektoreetako elkarte eta taldeekin elkarlanean.
Geltoki - Kultura eta trukerako gunea
Kulturgune bat da Geltoki, herritar orori irekia, eta hau du helburu: ekonomia sozial eta solidarioa eta kultura alternatiboa sustatzea Iruñean.
Geltoki Iruña Elkarteak kudeatzen du eremua. Erakunde hauek osatzen dute Elkartea: REAS Nafarroa Elkartea-Ekonomia Alternatibo eta Solidarioaren Sarea (REAS), Emauseko Trapuketarien Fundazioa, Nafarroako Nekazaritzako Produkzio Ekologikoaren Kontseiluko (CPAEN-NNPEK), Euskal Herriko Nekazarien Elkartea Nafarroa (EHNE Nafarroa) eta Elikagai Artisauen Ekoizleen Elkartea (25 artisau-enpresak osatua).
Iruña Stock
2007az geroztik antolatzen du azoka hori Iruñeko Udalak, hiriko merkatari-elkarteekin elkarlanean.
Hiriko merkataritza sustatzea da Iruña Stock azokaren helburua. Horretarako, plataforma bat eskaintzen die sektoreko profesionalei, beren produktuak prezio onean aurkezteko, eta herritarrei zuzendutako eskaintza gune bakar batean biltzeko.
Liburuaren eta Lorearen Eguna
Liburuaren eta Lorearen Eguna antolatzen du urtero Iruñeko Udalak apirilaren 23an, Diego de Haro liburu-saltzaileen elkartearekin batera. Jarduera horren bidez, Liburuaren Mundu Eguna ospatzen da, hiriko liburu-dendak ezagutzera ematen dira, eta gertuko denda gisa balioesten. Halaber, liburuak eta loreak protagonista dituen egun honetan Iruñeko erdigunea dinamizatzen da, eta ordu batzuetan zehar guztien arteko topagune bihurtzen da, kultura ardatz hartuta.
Merkataritzarekin, hiria, hiriago
2004an jarri zen martxan programa hori, Iruñeko Udalak eta hiriko merkatari-elkarteek bultzatuta, auzoko dendak herritarrei hurbildu eta hiriko bizitzan merkataritzak duen garrantzia azaltzeko. Besteak beste, produktu-dastaketak, kontzertuak, puzgarriak, lantegiak, dantza-erakusketak eta antzezpenak antolatzen ditu adin guztietako jendearendako, Iruñeko ingurune komertzial nagusietako batzuetan eta udaberri-uda sasoi komertzialean.
Gau zuri-gorria
Erdi Aroko Merkatua
Irailaren 8ko astean egiten da Hiru Burguen Erdi Aroko Azoka, Batasunaren Pribilegioa deritzona gogoratzeko. Zutoihalez eta estandartez apaintzen dira karrikak, eta zenbait artisau-produktu eta elikagai jartzen dira salgai, 120 postutan, hirigune historikoko kale nagusietan. Horrez gain, musika-emanaldiak egiten dira kalean, bai eta lantegiak eta antzinako lanbideen erakusketak ere, Hiru Burguen Erdi Aroko Merkatuan.
Tokiko produktuen astea
Bertako elikagaien eskaintza zabala izaten da hiriaren erdigunean, urteroko azoka horri esker; bide batez, elikadura osasungarria sustatzen da, eta ekoizleen lana eta tokiko ekonomiari eta jasangarritasunari egiten dioten ekarpena erakusten.
Black Friday
Eguberriak
Gabonetako argiak
Bereziki dotore jartzen da Iruña Gabonetako kanpainarako: argitu eta apaindu egiten dira kaleak, plazak, etorbideak eta auzoak, eta are ederrago agertu ohi dira hiriko dendak eta establezimenduak: betikoak, gureak.
Herritarrek eskura izaten dute aire zabaleko saltoki handi hori, behar dituzten erosketak egin eta familia osoarendako programatzen diren jarduerez gozatzeko. Iruñeko Udala da antolatzailea, hiriko merkatari-elkarteak lankide dituela.
Eguberriko Azoka
Abenduaren 14an hasi zen Eguberriko Azoka, eta 2019ko urtarrilaren 7ra arte izango dituzte ateak zabalik artisauen 27 postuek. Bi animazio-eremu handi jartzen dira Iruñeko bi ingurune komertzial nagusietan: 400 metro karratuko karpa bat Gaztelu Plazan, non familia osoarendako jarduera-programazioa egoten baita, eta 225 metro karratuko beste gune bat Karlos III.aren oinezkoendako pasealekuan.
Animazio- eta dinamizazio-jarduerak
Eguberrietako Ibilaldi Gozoak, txokolate-jan herrikoiak, dromedario gaineko ibilaldiak, Sarasate pasealekuko jolas-pista, zenbait animazio-jarduera auzoetan..., horra hurbileko merkataritzarentzat urteko garrantzitsuena den Gabonetako kanpainako animazio- eta dinamizazio-eskaintza.
TOKIKO PRODUKTUEN ARTISAUTZA AZOKA
2024ko abuztuaren 3an, larunbatarekin, 2024ko NAFARROAKO ARTISAUTZA AZOKA abiatuko da Iruñeko Basotxoan, eta 2024an, hileko lehen larunbat guztietan eginen da. Ordutegia 10:00etatik 15:00etara izanen da.
TOKIKO PRODUKTUEN ELKARTEAK ETA NAPAR BIDEAK ELKARTEAK antolatzen dute, eta Iruñeko Udalaren babesa du.
Azokak 20 postu izanen ditu, 10 nekazaritzako elikagaien artisautzakoak eta 10 artisautzakoak, Nafarroako 0 kilometroko ekoizpenaren erakusgarri. Enpresa horiek Nafarroako herri txikietan kokatzen dira, eta Nafarroako hiriburura gerturatzen dira, bertako produktuak bisitariei eta kanpotarrei bertatik bertara erakusteko.
Tokiko enplegua sortzen duten enpresa txikiak dira, eta Foru Erkidegoko landa eremuen despopulazioaren aurkako borrokan laguntzen dute.
Lurraldeko artisau-produktuak bultzatzen eta sustatzen dituzte, elikadura-produktuetatik hasi (gazta, gozogintza, eztia...) eta larruzko, zeramikazko edo kosmetikako artisau-sorkuntzetaraino.
Produktuak benetakoak, puruak eta tradizionalak dira.
Artisau Elikagai bat aukeratzea gauza naturaletara itzultzea da, haurtzaroko zapore eta usain haiek berraurkitzea.
Azoka hileko lehen larunbatetan eginen da, hiriaren erdigunean, Taconerako lorategien ondoko Basotxoan eta San Lorentzo elizaren (San Fermin kapera) eta Iruñeko Kale Nagusiaren aurrean. Lehenbiziko larunbata: abuztuak 3, 10:00etatik 15:00etara.
TOKIKO PRODUKTUEN IX. ASTEA
2024an, Tokiko Produktuen Iruñeko Asteak IX. edizioa izanen du, eta tokiko produktuak, ekoizleen lana eta tokiko ekoizpenaren inguruko filosofia ikusarazi eta balioan jarri nahi ditu, jasangarritasunari eta elikadura-ohitura osasungarriei egiten dieten ekarpenagatik, elikagai horien kalitate egiaztatuagatik eta Iruñeko eta Foru Komunitate osoko ekonomiaren motorra izateagatik.
Era berean, Alorraren ustez, tokiko produktuak sustatu, zabaldu eta gure eguneroko bizitzan egon daitezen laguntza soziala eta instituzionala ematea oso garrantzitsua da haien biziraupenaren alde lan egiten duten talde eta erakundeendako.
Filosofia horri jarraituz, Iruñeko Udalak Tokiko Produktuen IX. Astea antolatu du, Foru Komunitatean modu batera edo bestera bertako produktu-marka sendotzeko lanean ari diren entitateekin elkarlanean. Honako hauekin:
LANKIDETZA-HITZARMENA IRUÑEKO UDALAREN ETA HONAKO HAUEN ARTEAN:
- NAFARROAKO NEKAZARITZA PRODUKZIO EKOLOGIKOAREN KONTSEILUA (CPAEN-NNPEK)
- NAFARROAKO NEKAZARITZAKO ELIKAGAIEN TEKNOLOGIEN ETA AZPIEGITUREN INSTITUTUA (INTIA)
- NAFARROAKO ELIKAGAI ARTISAUEN EKOIZLEEN ELKARTEA
- BIZILUR
Edizio hori 2024ko urriaren 7, 8, 9, 10, 11, 12 eta 13an eginen da.
