BARNEKO INFORMAZIO SISTEMA. BARNEKO INFORMAZIO SISTEMA KUDEATZEKO PROZEDURA
Kanal honen xedea da sektore publikoan edo pribatuan lan egiten duten informatzaileengandik bildutako informazioak jasotzea, izapidetzea eta horien jarraipena egitea, baldin eta Iruñeko Udaleko, Hirigintza Gerentziako, Iruña Biziberritzen SA., Comiruña SA eta Gayarre Antzokia Udal Fundazioko
lan- edo lanbide-arloko arau-hausteei buruzko informazioa jaso badute. Hona hemen zein arau-hauste salatzen ahal diren (Zer salatu dezaket?) eta nork salatzen ahal dituen (Nork egin dezake salaketa?)
Barneko Informazio Sistema komunikazioak jasotzeko barne-kanalak eta informazioak kudeatzeko prozedurak osatzen dute, eta Barneko Informazio Sistemaren arduradunaren agindupean funtzionatzen du.
Xedea da arau-hausteei eta ustelkeriaren aurkako borrokari buruzko informazioa ematen duten pertsonak babesteari buruzko otsailaren 20ko 2/2023 Legearen 3. artikuluan aipatzen diren pertsonek ezagutzen dituzten jokabide irregularren berri eman ahal izatea. Era berean, horien jarraipen eraginkorra egiten dela zaintzen du, independentzia, konfidentzialtasuna eta segurtasuna erabat bermatuz.
Gainera, eta Barneko Informazio Sistemaren Erregelamenduaren xedapen gehigarriaren arabera, salaketen barne-kanala da Iruñeko Udalak Iruzurraren Aurkako Batzordearen eskumenekoak diren arau-hausteen salaketak egiteko gaitu duen baliabidea. Batzorde hori Next Generation EU programa europarra kudeatzeko Suspertze, Eraldatze eta Erresilientzia planaren esparruan onetsi zen.
Salaketa bidali baino lehen, egiaztatu zehatz-mehatz zer salatzen ahal den, nork egiten ahal duen eta nola egiten ahal duen izapidea.
Zer salatu dezaket?
2/2023 Legearen 2. artikuluan xedatutakoaren arabera, honako irregulartasun hauek komunikatzen ahalko dira:
a) Europar Batasuneko Zuzenbidearen aurkako arau-hausteak izan daitezkeen ekintzak edo ez-egiteak, arau-hausteei eta ustelkeriaren aurkako borrokari buruzko informazioa ematen duten pertsonak babesteari buruzko otsailaren 20ko 2/2023 Legearen 2.1 a) artikuluan ezarritakoaren arabera.
b) Espainiako legeriaren arabera arau-hauste penal edo administratibo astun edo oso astun izan daitekeen edozein ekintza edo ez-egite, eta, nolanahi ere, Ogasun Publikoari eta Gizarte Segurantzari kalte ekonomikoa eragiten dietenak.
c) Next Generation EU programa europarra kudeatzeko Suspertze, Eraldatze eta Erresilientzia planaren esparruan onetsitako Iruzurraren Aurkako Batzordearen eskumenekoak diren salaketak.
Nork salatu dezake?
Sektore publikoan edo pribatuan lan egiten duten informatzaileengandik jasotako informazioak jaso, izapidetu eta jarraituko dira, baldin eta Iruñeko Udaleko, Hirigintza Gerentziako, Iruña Biziberritzen SA., Comiruña SA eta Gayarre Antzokia Udal Fundazioko lan- edo lanbide-arloko arau-hausteei buruzko informazioa lortu badute:
- Enplegatu publikoek edo besteren konturako langileek.
- Autonomoek.
- Enpresa baten administrazio-, zuzendaritza- edo gainbegiratze-organoko akziodunek, partaideek eta kideek, kide ez exekutiboek barne.
- Kontratista, azpikonstratista eta hornitzaileendako zein horien gainbegiratze edo zuzendaritzapean lan egiten duen edozeinek.
- Lan-harreman baten esparruan edo amaitutako harreman estatutario batean arau-hausteei buruz lortutako informazioa publikoki jakinarazten edo ezagutarazten duten informatzaileek, boluntarioek, bekadunek, prestakuntza-aldian dauden langileek, ordainsari bat jaso ala ez, eta lan-harremana oraindik hasi gabe dutenek, arau-hausteei buruzko informazioa hautaketa-prozesuan edo kontratua sinatu aurreko negoziazioan lortu bada.
Nola eta non egin dezaket salaketa?
2/2023 Legean aurreikusitako arau-hausteren baten berri duen pertsonak honako bide hauetako baten bidez jakinarazten edo salatzen ahalko ditu gertakariak:
- Ahal dela idatziz, intranetean eta Iruñeko Udalaren web atarian eskuragarri dagoen Barneko Informazio Kanalaren bidez (Formularioa).
- Posta elektronikoz: canaldedenuncias@pamplona.es
- Posta arruntaren bidez, posta-helbide honetara: Barneko Informazio Kanala. Iruñeko Udala, Barneko Informazio Sistemaren arduradunaren departamentua, Udaletxe plaza, zk.g., 4. solairua - 31001 Iruña.
- Telefonoz: (+34) 948 420 177
- Aurrez aurreko bilera baten bidez. Bilerarako hitzordua aurrez eskatu beharko da (+34) 948 420 177 telefonoan. Eskaera egin ondoren, informatzaileari gehienez ere 7 egun balioduneko epean emanen zaio hitzordua.
