IRUÑEKO GAZTEDIAREN ETXEA

ZENBAT ERABILTZAILE GUZTIRA

JARDUERAK<4>

JARDUERA MOTA	KOPURUA
	2018	2019	ALDAKUNTZA
Aisialdiko eta denbora libreko ikastaroak	101	116	+ % 15
Doako informatika-lantegiak	44	35	– % 20
Programazio Zerbitzuaren ekitaldiak	27	34	+ % 26
Erakusketak	12	9	– % 25
Aisia-larunbatak	10	10	% 0
Gazte-elkarteen ekintzak: «Antolatu zure ekitaldia»	53	49	– % 8
Kafehartzen	-	66	-
Bertze jarduera batzuk	32	31	– % 3
Jarduerak, guztira	279	350	+ % 25

JARDUERA-MOTA

INFORMAZIO-ZERBITZUAK

	ERABILTZAILEAK
	2018	2019	ALDAKUNTZA
Gazteendako Informazio Bulegoa	8.781	8.673	– % 1
Aholkularitza Juridikoa	490	475	– % 3
Gazte Elkartegintzari buruzko aholkularitza	259	227	– % 12
Gazte-ekintzailetza, aholkularitza	-	35	-
Aholkularitza Psikologikoa	196	140	– % 28
Ikasketa-aholkularitza	168	190	+ % 13
Bidaiategia	83	88	+ % 6
Boluntarioendako Argibide Bulegoa	691	737	+ % 7
Bisita gidatuak	-	275	-
GUZTIRA	10.668	10.840	+ % 2

ZIBERGELA

	ERABILTZAILEAK
	2018	2019	ALDAKUNTZA
Zibergela	8.696	12.480	+ % 43
WIFI erabiltzaileak	5.136	-	-
Iruña Gaztemaker Space	792	803	+ % 1
GUZTIRA	14.624	13.283	– % 9

GAZTEENDAKO DIRULAGUNTZAK ETA LAGUNTZAK

EKINTZAILE GAZTEENDAKO DIRULAGUNTZAK

Dirulaguntza honetarako deialdiak 50.000 euroko zuzkidura izan du. 36 eskaera aurkeztu dira, hau da, % 44 gehiago aurreko urtearekin alderatuta; horietatik 34k jaso dituzte laguntzak, 48.020,66 € guztira. Ekintzaileen profilari dagokionez, 31-35 urte bitartekoak dira gazte ekintzaileen % 50; 25-30 urte bitartekoak % 44, eta 18-24 urte bitartekoak % 6. Sexuari dagokionez, % 68,42 emakumeak dira, gehienak autonomoak. 53 lanpostu sortu dira.

DIRULAGUNTZAK, GAZTEENTZAKO JARDUERAK EGITEKO

Deialdi honek 51.000 euroko zuzkidura du; horietatik 36.000 A modalitatean sartutako proiektuetarako dira, eta gainerako 15.000 euroak B modalitateko jardueretarako. Aurtengo deialdia berrikusi da, eta aldaketak egin dira dirulaguntzaren eskaera eta proiektuen eta jardueren justifikazioa arintzeko, eta, horretaz gainera, diruz lagundutako ekintzak egitea erraztu da, funtsak aurreraturik. Urte honetatik aurrera, nahitaez, dirulaguntzen eskaerak telematikoa izan behar du, eta horrek ere aldaketak ekarri ditu deialdiaren diseinuan eta eranskinetan.

Orotara 16 eskaera aurkeztu dira, 14 eskaera A modalitatean (proiektuak) eta bertze bi B modalitatean (jarduerak). B modalitateko biak ezetsi ziren, deialdian ezarritako helburua ez betetzeagatik, bai eta A modalitateko bat ere, ezarritako gutxieneko puntuaziora (60 puntu) ez iristeagatik. Azkenik, 13 proiektu lagundu dira diruz, eta horien artean banatu dira dirulaguntza honetako funts guztiak.

Hauek dira dirulaguntza jaso duten erakundeak: Jóvenes para Cristo elkartea, Antitele Denbora Libreko Kluba, Asociación SEI – Servicio Socioeducativo Cultural, Albatros kluba, Grupo Scout V Tropa gazte-elkartea, Grupo Scout Mikael gazte-elkartea, Garaiz gazte-elkartea, Nafarroako Scout Katolikoen Elkarteen Federazioa, EPS Nuestra Señora de la Paz, Grupo Scout Dendari Izar Eskaut Taldea gazte-elkartea, Scouts de Navarra Movimiento Scout Católico, Grupo Scout Baracea Skaut Taldea eta I Becchi gazte-elkartea.

GAZTEEN EKIMENEI LAGUNTZEA

Gazteria Unitateak dirulaguntza indibidualizatuen bertze deialdi bat abiaraztea aurreikusi du, gaur egun dauden deialdietatik kanpo geratzen diren gazte-ekimeneko jarduerak babesteko tresna bat sortzeko. Dirulaguntza horren prozesua sortzeko lanean ari dira, eta orain arte zuzenean diruz laguntzen ari ziren gazte-jarduera batzuk prozesu horretara bideratuko dira, dirulaguntzen etorkizuneko deialdia osatzeko estrategia gisa. 2019an bi laguntza-ekimen izapidetu dira laguntza-modalitate horretan: lankidetzako grafiti bat Carbonillan eta musika elektronikoko programazio bat Mendillorriko lakuan.

PIRINIOETAKO ZEHARKALDIA

SCDR Anaitasuna elkarteak urtero antolatzen du jarduera hau; Gazteria Unitateak, bere aldetik, 16-30 urteko gazteei dirulaguntza ematen die: ekimen horretan izena emateko kostuaren % 40. Azkenik, neska gazte bakarrari eman zaio dirulaguntza hau.

PROGRAMAK

LITERATURA-LEHIAKETA

Udalak gazteendako antolatzen duen literatura-lehiaketara 133 lan aurkeztu dira, 2018an baino % 8 gehiago. Horietatik 60, poesian (41 gaztelaniaz eta 19 euskaraz): 36 lan 14 eta 16 urte bitarteko kategorian eta bertze 24 lan 17 eta 18 urte bitarteko kategorian; narratibari dagokionez, 73 lan (66 gaztelaniaz eta 7 euskaraz), horietatik 50 lan, 14 eta 16 urte bitarteko kategorian, eta 23 lan, berriz, 17 eta 18 urte bitartekoan.

Aurtengo deialdiko nobedadea webgune bat (www.letrajoven.com; www.letragaztea.com) martxan jarri izana da. Bertan, saritutako lanak argitaratzen dira, eta 2018an saritutako lanen paperezko edizioa ordeztu du.

GAZTEENDAKO BERRIEMAILEAK

Gaztediaren Etxeko Gazteendako Informazio Bulegoaren mendeko Berriemaileen Programa 1996/1997ko ikasturtetik aurrera egin da etenik gabe. Gaztediaren Etxeak eta Gazteria Unitateak elkarrekin jarri dute abian, ikasturte hasieran beti egiten duten bezala, ikastetxeetan eta ikastetxe nagusietan gazte-informazioa sustatzeko programa hau; halaber, gazteendako, gazte-elkarteendako eta bertze gaztegune batzuendako profesionaltasun-ziurtagiriak eskaintzen dituzten erakundeei ere parte hartzeko aukera eman zaie.

2018/2019ko ikasturtean izandako parte-hartzeari dagokionez, aurreko aldian bezala, 44 ikastetxek parte hartu dute, eta guztira 88 berriemaile hautatu dira.

ENTSEGU-BONOAK

Musika-talde berriei laguntzeko programari eutsi zaio, eta entsegu-gela berri bat sartu da bertan. Aurten ere handitu egin da entsegu-bonuen zenbatekoa, 60 €-raino, eta taldeek entsegu-aretoak hilean alokatzeko edo, nahiago badute, ordukako alokairuari eusteko aukera dute.

Programaren barruan, Iruñeko Udalak 353 entsegu-bonu eman ditu aurten, 293 areto batean eta 60 bertzean. Guztira 48 taldek eskatu dute zerbitzua, 2018an baino % 71 gehiagok.

MUSIKA MARTXAN

Programa honen barruan sartzen da musika-talde hasiberrien poltsa, zeina martxoan eta apirilean eguneratzen den; gaur egun 15 talde daude izena emanda. Talde horietako bi sanferminetako Gazte Gunean jotzeko aukeratzen dira, eta beste bat Baionara joateko, hiri horretan egiten den Musikaren Bestara. Urrian Musika Martxan Fest egin da, zerrendan izena eman duten musika-taldeek eta jotzen hasi diren bertze batzuek ere oholtza gainean aukera bat izan dezaten. Jardunaldi horietan sartu dira, halaber, Baiona Live Festivalen finalaurrekoetara iritsi ziren Iruñeko bi taldeak eta Zestoako talde irabazlea.

ALKOHOLAREN ETA BERTZE DROGA BATZUEN KONTSUMOAREKIN LOTURIKO ARRISKUAK MURRIZTEKO ESKU-HARTZE PROGRAMA

Kontratu berria esleitzeko fasean, enpresa bakarra aurkeztu da: Hegoak. Enpresa hori aritu da aurreko urteetan programa gauzatzen. Hori horrela, jaiguneetan alkoholaren eta bertze droga batzuen kontsumoarekin lotutako arriskuak murrizteko sentsibilizazio-kanpainarekin jarraitu nahi da, batez ere sanferminetan eta auzoetako jaietan. Kanpaina gazteei zuzendua da, mezu zehatzez osatua eta hainbat hedabidetara egokitua, komunikazio-ildo bat sortzeko eta diseinatzeko.

San Fermin.- Sanferminetan esku hartzeko, informazio-gune finko bat gaitu da Errekoleten plazan. Bertan, informazio- eta hezkuntza-arloko esku-hartze bat egiten da, bereziki gazteei zuzenduta. Egunak eta ordutegia: uztailaren 6an, 15:00etatik 19:00etara, eta uztailaren 7tik 13ra, 23:00etatik 03:00etara.

Gune finkoko datu orokorrak:

Banatutako materialak, guztira	873
Gunera hurbildu diren eta bertan parte hartu duten pertsonen zenbatespena	817
Gizonak	514
Emakumeak	303
Galderak zituzten pertsonak, gutxi gorabehera	406
Adin-tarteak	15 - 52

Halaber, informaziorako 2 gune ibiltari instalatu dira, eta informazio- eta hezkuntza-lana egin da aurreko urteko behaketaren bitartez gazteen kontzentrazio eta joan-etorri handiena zutela detektatutako eremuetan. Egunak eta ordutegiak: uztailaren 6an, 16:00etatik 18:00etara, eta uztailaren 7tik 13ra, 23:00etatik 03:00etara; bertze gunean, berriz, hauek: uztailaren 6tik 13ra, 19:00etatik 23:00etara. Orotara 1.505 pertsona inguratu ziren (820 emakume eta 685 gizon).

Auzoak.- Kontratua ez zegoen esleiturik auzoetako jaiei hasiera ematean, martxoan, baina programa gauzatzea erabaki da eta, horretarako, Hegoak elkartea hartu da kontuan. Jai Batzorde eskatzailearekin batera, auzo bakoitzerako berariazko programazio-proposamen bat egin da, inguruko beharretara egokituta eta esku hartzen duen elkartearen eta gizartearen errealitatea kontuan hartuta. Sanduzelai, Txantrea, Arrotxapea, San Juan, Azpilagaña, Iturrama, Mendillorri, Arrosadia eta Alde Zaharra auzoetan ezarri dute programa.

Bertze auzo batzuetan, hala nola Buztintxurin eta Ermitagañan, kontsumoetan arriskuak prebenitzeko informazio-lantegiak egin dira familientzat eta bitartekari-informatzaileentzat. Gainera, Txantreako jaien aurreko egunetan, auzoko 8 etxabetan sentsibilizazio bat egin da jaietako espazioetan egiten diren prebentzio-jarduerei buruz.

ESKU-HARTZEAK ETXABEETAN

Iaz etxabeen gida argitaratu ondoren, Gazteria Unitateak Iruñean aisialdiko lokalei buruz indarrean dagoen araudiari buruzko hurbilketa eta sentsibilizazioa egitea aurreikusi zuen. Horretarako, lan bat hasi zen iazko urtearen amaieran, eta Hegoak elkarteak esku hartzeko proposamena egin zuen. Hegoak elkarteak aurkeztu duen proiektuaren helburua da araudia gazteak dauden lokaletara hurbiltzea eta, modu osagarrian, gazteriarekin eta aisialdiko eta denbora libreko bizipenekin zerikusia duten gaiei buruzko gizarte- eta hezkuntza-arloko esku-hartze prozesuetan parte hartzea eskaintzea. Iruñeko auzo guztietan esku hartu nahi da, baina, aurrekontua dela eta, lokal gehien duten auzoetatik hasten da: Arrosadia, Azpilagaña eta Mendillorri. Orotara, 29 etxabetara jo da: 15 Arrosadian, 9 Azpilagañan eta 5 Mendillorrin, eta harrera ona izan da.

SEXU-HEZKUNTZA ETA HORREKIN LOTUTAKO ARRISKUEN PREBENTZIOA

2018az geroztik, Gazteria Unitateak lan-ildo bat du sexualitatearen gaia gazteekin eta gazteentzat lantzeko. Egindako ekintzen artean, nabarmentzekoa da sexu-heziketarako kanpaina, Hiesaren Aurkako Batzordearekin eta Nafarroako Gazteriaren Kontseiluarekin batera, bai San Fermin jaietan, bai auzoetako jaietan. Kanpainaren barruan sentsibilizazio-ekintzak egiten dira, bai eta prebentzio- eta hezkuntza-materiala banatu ere.

«TXANKLETAK» UDAKO PROGRAMA

Kirol-jarduerak programatu dira, hala nola urpekaritza, saltinga (saltoka), eskalada eta piraguismoa, baita adimena lantzeko jarduerak –Ziudadelako Zonbien Inbasioa, adibidez, Kultura alorrarekin batera antolatua Harresien Jaialdiaren barruan; nobedade gisa, Gaztediaren Etxeko antzerki-talde batek dinamizatu du–, eta kultur arlokoak ere bai –zinemarako sarrerak, bertzeak bertze–.

Guztira 125 toki eskaini dira kirol-jarduera bakoitzerako, 135 Zonbien Inbasiorako eta 1.000 zinemarako.

• Eskalada, rapela eta abentura-parke handia: 64 (gizonak % 39,06 eta emakumeak % 60,94)
• Urpekaritza-bataioa: 105 (gizonak % 60,95 eta emakumeak % 39,05)
• Saltinga: 84 (gizonak % 58,33 eta emakumeak % 41,67)
• Piraguismoa: 125 (gizonak % 47,20 eta emakumeak % 52,80)
• Zonbien inbasioa: 134 (gizonak % 45,52 eta emakumeak % 54,48)

Txankletak jaialdiaren barruan, gainera, «Egunero plan bat Gazteriaren Etxean» programatzen da, eta abuztuan guztira 21 jarduera antolatu dira haren barruan. Etxearen jarduera horiezaz gainera, aurten Iruñeko zenbait zentro komunitariotan (Mendillorri, Buztintxuri, Ermitagaña eta Arrotxapean) eginiko bertze lau jarduera ere bildu behar dira.

Egun bakoitzeko programazioan 411 gaztek parte hartu dute; hau da, aurreko urtearekin alderatuta, % 2 gehiagok: 108 mutilek (% 26,28) eta 303 neskak (% 73,72).

SANFERMINETAKO GAZTE-EREMUA

Kultura Alorrarekin koordinatuta, nerabezaro-aurreko gazteendako eta nerabeendako (12-17 urte) programazioa diseinatu da, xede harturik populazioaren segmentu horren behar eta ezaugarrietara egokitutako jarduera alternatibo espezifikoak eskaintzea. 2018an bezalaxe, ekitaldi honetan programazioa hilaren 7tik 14ra izan da eta, horrenbestez, sanfermin osoak hartu ditu (hilaren 6a izan ezik, egun hori berezia baita). Aurreko urteetako leku berean egin zen, Foruen plazan.

Programazioak Iruñeko gazteek eginiko 500 inkesta baino gehiago hartzen ditu kontuan. Musika, dantza, lantegiak, bakarrizketak, kontzertuak eta DJak biltzen ditu. Gazte askok parte hartzen dute horiek dinamizatzen. Halaber, Gazteen Gurutze Gorriko bi animatzaile daude espazioa dinamizatzeko, eta community manager bat edukiak dinamizatzeko eta sare sozialen jarraipena egiteko.

EGUBERRIETAKO ZINEMA

Hirugarren urtez jarraian, «Eguberrietako Zinema» kanpaina egin da, zeinaren helburua baita gazteei modu onean aisialdiko aukera bat eskaintzea hirian eskolako oporraldian. Iruñeko 14 eta 30 urte bitarteko gazteentzat 1.200 txartel erosi dira, zinemako sarrerekin trukatzeko.

BERTZE LAN-ILDO BATZUK

CREACITY-BAIONA

Aurrera segitzen du Creacityko lantaldearekiko harremanak, Baionarekin zehazki, eta lan egiten jarraitzen da musikaren munduaren inguruan aukerak eta sareak sortzeko eta Baionako eta Iruñeko musika taldeen arteko trukeak egiteko. Aurten hiriko zenbait taldek parte hartudute Bayonne Live Festival lehiaketan, eta entsegu-areto baten arduraduna izan da lehiaketako epaimahaiko kide. Ekainaren 21ean, Taldeen Burtsan izena emanda dagoen musika talde bat Baionan musikaren eguna ospatzeko antolatutako kontzertuetan aritu da.

Lan-ildo horretaz gainera, balioesten ari dira Baionako auzo bateko MVC baten (Maison de la Vie Citoyenne, hiri-bizitzako etxea) eta Iruñeko zentro komunitarioetako baten arteko trukea eta ezagutza ere. Baionan Musikaren Besta egiten zela eta, Iruñeko eta Baionako Udaleko Gazteria teknikariek MVCa bisitatu zuten.

IRUÑEKO 2030EKO PLAN ESTRATEGIKOA

Urtarrilean eta otsailean Bulego Estrategikoarekin batera lan egin da, gazte jendez osaturiko zenbait lantalde eginez, Hiri Plan Estrategikoaren inguruko dinamikak antolatzeko. Zehazki, 3 talde antolatu dira: bat Nafarroako Unibertsitate Publikoko ikasleekin, bertze bat Nafarroako Unibertsitatekoekin eta hirugarrena Gazteen Etxeko Informazio Zerbitzuetako pertsonekin. Guztira 80 gazte inguruk parte hartu dute, eta egungo Iruñeaz eta izan nahiko luketen Iruñeaz galdetu zitzaien.

HAURTZARO-PLANA

Hilabete hauetan bilerak egin dira Udaleko Haurren Planaz arduratzen den teknikariarekin, plana aurkezteko eta bi arloen arteko aliantzak eta lankidetza-aukerak bilatzeko. Planaren puntu garrantzitsuenetako bat «planaren kideen» sare bat sortzea da, informazio-korrespontsaliak simulatzeko eta sare hori sortu nahi den haurren partaidetza-organorako aprobetxatzeko. Ikastetxeek ere parte hartzen dute planaren aurkezpenean.

HIRI HEZITZAILEAK, «BALIOEN HIRIA»

Aurten ere Balioen Hiria sare tematikoan parte hartu da. Jardunaldiak Bilbon egin dira, apirilaren 4an eta 5ean. Hauek izan dira lanerako gai nagusiak: sarearen balioen agiria onartzea, agenda komun bat diseinatzea, eta agiriaren balioen inguruko jardunbide egokiak ezagutzea, hainbat hiritan egiten baitira. Gazteria Unitateak jardunbide egoki gisa aurkeztu du «gazteendako berriemaileak» programa, jasangarritasunaren, elkartasunaren, parte-hartzearen eta erantzukidetasunaren balioetan oinarriturik. Era berean, 2020ko martxoaren 11, 12 eta 13an Sevillan egindako estatu-topaketa aurkeztu da. Jardunaldietan parte hartu ondoren, hainbat esperientzia partekatu dira Udaleko bertze arlo batzuetako teknikariekin, eredu izan daitezkeelakoan. Sarearen hurrengo bilera azaroaren 21ean eta 22an izan zen, Bilbon

LATITUDES IRAKURKETA-KLUBA

Hezkuntza, Herritarren Partaidetza eta Gazteria Alorraren eta Gizarte Zerbitzuen Alorraren arteko akordio baten babesean, Gazteriako teknikari batek irakurketa-klub bat koordinatu eta monitorizatu du San Frantziskoko liburutegian, herritartasun globala interesgune gisa hartuta. Irakurketa-kluba 2019-2020ko ikasturtean ere eginen da, eta horren oinarri den akordioak aukera ematen du Gazteria Unitatearen eta Garapenerako Nazioarteko Lankidetzaren Udal Programaren artean baterako bertze ekintza batzuk egiteko.

2018-2019ko denboraldian klub honek 20 laguneko taldea zuen. Hurrengo denboraldirako, 2019- 2020rako, bigarren talde bat jarri da martxan, ekimenak izan duen eskaerari erantzuteko. Beraz, orain talde honetako bi talde daude, eta guztira 40 lagunek eman dute izena. 2019an orotara 12 saio egin dira.

2018-2019ko denboraldiari amaiera emateko, topaketa bat egin zen Paloma Camacho poetarekin, eta ezohiko bilkura bat, Emakumeen Arretarako Udal Zerbitzuarekin batera.

BREATHLESS PROPOSAMENA

Sanduzelaiko Breathless Center dantza-eskolarekin harremanetan jarri ziren, gazte-gunean masterclass bat dinamizatzeko. Azkenik, ez zen akordiorik lortu, baina berriro jarri ziren harremanetan Gazteria Unitatearekin, eta hainbat dantza-estiloren inguruko ekitaldi/lehiaketa bat antolatzeko proposamena aurkeztu zuten, hiriko bertze arte-diziplina batzuk bildurik, hala nola grafitiak, skatea, BMX, eta beste. Hori horrela, Bilboko Break on Stage ez ezik Zaragozan, Donostian edo inguruko hirietan egiten diren bertze ekitaldi batzuk ere hartzen ditu erreferentziatzat. Baloratzeko dago.

RUBIKEN KUBOAREN LEHIAKETA NAZIONALA

Gaztediaren esparruko lan-ildoetako bat gazte-jarduerak eta -proiektuak babestea da, eta, horri dagokionez, martxoan Labriten egindako Rubiken Kuboaren Lehiaketa Nazionala babestu da. Bertan 71 lehiakidek parte hartu zuten araututa dauden 18 modalitateetatik 13tan. Programak izandako harrera ona kontuan hartuta, txapelketa antolatzen duten gazteekin elkarlanean jarraitzea aurreikusi da, Gazteen Etxean hartuz eta ekitaldia antolatzeko prozesuan lagunduz.

GAZTERIAREN KONTSEILUA

Hilabete hauetan hainbat bilera egin dira Gazteriaren Kontseiluko teknikariekin. Lehenengoak gazteria-talde tekniko berria eta CJN-NGK garatzen ari zen lan-ildo batzuk aurkezteko balio izan zuen. Ondoren, Kontseiluak, Foru Parlamenturako hauteskundeak zirela eta, «Gazteria eta politikariak, hitz eginen dugu?» proiektua aurkeztu zuen. Proiektu horrek Gazteria Unitatearen laguntza izan zuen proiektua zabaltzeko, jarraipena egiteko eta Iruñean gazteekin eta ordezkaritza politikoarekin elkartzeko egunean egoteko.

Halaber, kontseiluarekin ere harremanetan da, sexu-osasuneko kanpainarako.

NAFARROAKO KIROL ETA GAZTERIAREN INSTITUTUA

Gazteriaren Etxeko kudeaketa-taldeak eta udal-teknikarien taldeak Nafarroako Kirolaren eta Gazteriaren Institutuaren prestakuntza-jardueretan, koordinazio-bileretan eta lan teknikoko mahai espezifikoetan parte hartzen dute. Gaur egun, gazteriaren arloko koordinazioa sistematizatzeko prozesuan dago Nafarroako Kirolaren eta Gazteriaren Institutua, eta prozesu horretan aktiboki lan egiten du Gazteria Unitateak.

Halaber, Gazteria Unitateak Nafarroako Kirolaren eta Gazteriaren Institutuaren 2019ko Gazteentzako Programak gauzatzeko toki-erakundeendako dirulaguntzan parte hartu du.

ZURRUMURRUEN AURKAKO GAZTE TOPAKETA

Goi-bilera horiek 2016. urteaz geroztik egiten dira, eta helburua da gogoeta egitea, eztabaidatzea eta estereotiporik gabeko eta aurreiritzirik gabeko gizartea bultzatzeko estrategiak bilatzea.

Aurten, Gazteria Unitatea Ekintza Komunitarioko Arloarekin lankidetzan aritu da: partaideak Madrilen irailean egin zen IV. Zurrumurruen aurkako Gazteen Goi-bilerara joatea finantzatu. Zurrumurruen aurkako estrategia lantzen ari diren elkarteetako 14 gaztek parte hartu dute. Elkarte horietako asko Zaskakoak dira, Nafarroako Zurrumurruen Aurkako Sarekoak. Sare hori 30 bat gizarte erakundek eta udalek osatzen dute.