URROBI ERREKAREN, IRATI ERREKAREN ETA MANUEL DE FALLA KALEAK BERRURBANIZATZEKO PROIEKTUA
Aurrekontua: 55.660,00 €
Enpresa esleipendunak: -
Proiektugileak eta laguntzaileak: CIMA Ingenieros SL eta SUMA Urban Sustainability Consultants
Udal-arduraduna: Jose Ignacio Iribarren Berrade, Udaleko arkitektoa; Raquel Pérez Villanueva, Udaleko arkitekto teknikoa.
Kokapena: IRUÑEKO MILAGROSA AUZOA
Posta-kodea: 31006
Oraingo bide-sistema osatzen duten kaleak gehienez 15 metro zabal dira eta espaloi estuak dituzte bi aldeetan. Galtzadako alboak aparkatzeko prestaturik daude, linean albo batean, eta baterian bestean. Hiriko alde honek hiri-egitura desantolatua dauka ezaugarri, 60ko urteetan orografia konplexu batean egindako eraikitze-lanen ondorioz. Eraikinak, gehienak beheko solairu eta lau solairukoak, etxe-uharte irregularretan antolaturik daude, sotorik eta aparkaleku pribaturik gabe. Proiektuak Milagrosa auzoko erdigunea egituratu nahi du, bizitegi-kaleen bi ardatz sortuta, oinezkoen erdigune zabal batekin batera. Halaber, egoteko esparru batzuk sortuko dira auzoa zeharkatzen duten joan-etorri handieneko aldeetan.
- Ipar-hegoko ardatza: elkarbidea izanen da auzoko hegoan garatzen ari den eremu berria (Arrosadia) eta iparreko alde finkatuak (Felisa Munárriz plaza) lotzekoa.
Proiektuak proposatzen du zenbait kale-tarte osorik oinezkoendako izatea, bertako erabilerek ez baitute behar izaten autoen ohiko sarrerarik; gainerako tarteak oinezkoek nagusiki erabiltzeko diseinatu eta egin dituzte. Proposamenak berrantolamendu orokorra jartzen du mahai gainean, auzoa zeharkatzen duten ibilbide zirkularrik eta lasterbiderik gabe; zirkulazioa, horrenbestez, murriztuko da. Planteamendu horrek bizikletekiko elkarbizitza erraztuko du, izan ere, hiri-diseinu berria gida bat izanen da bizikletek modu antolatuagoan zirkulatzeko, hurbiltasun-sarearen barruan, zeina jada badiren beste tarte batzuekin lotzekoa baita, inguruetako hiri-ibilbideetara iritsi arte. Hori horrela, orain ibilgailuen zirkulazioa eta ibilgailuak aparkaturik dituzten guneak oinezkoei itzulitako gune libre bilakatuko dira; horrez gain, itzalpeko egonlekuez eta ekipamendu publiko berriez hornitu dira, auzotarren arteko harremanak eta topaketak errazte aldera.
Iruñerriko Mankomunitateak, bestalde, jarduketa-esparruan instalatuta dauden sareak berrituko ditu, eta ur beltzen eta euri-uren kolektoreak, PVCkoak, paraleloan banaturik dituen sare bereizi bat jarriko du, erregistro estankoekin eta hornidura-sare berri batekin. Argiteria publikoa gaur egun eraikinetako fatxadetan jarrita dago; horren ordez oinezkoendako argiak paratuko dira bide erdian: led-argi bikoitzak, alde banatan, 6 metroko zutabe baten gainean, bi ardatzetan.
Eremua lorategiz hornitzeko planteamenduari dagokionez, oinezkoendako diseinuak ardatzetan paratzekoak diren zuhaitz-ilara berriak ditu babes eta indargune, Ligustrum Japonicum variegata aleekin eta garaian garaiko zuhaitz bereziagoekin; xede horretarako, Acer Rubrum Redpointed aleak landatuko dira. Tamaina ertaineko zuhaitzak erabiliko dira, neurriz garatzekoak eta hosto erorkorrekoak, fatxadetan enbarazurik eragin ez eta neguan argia sartzen uzten dutenak.
Gune bereziek, ardatzen abiapuntuek eta bidegurutzeek eremu lorategidunak edukiko dituzte, era eta kolore askotako tapiz-landare eta zuhaixkekin. Bizilagunendako aparkaleku bat sortuko da, 234 plazarekin, oraingoz libre dagoen udal-zuzkidurako lurzati batean, Blas de la Serna kaleak Fernando Remacha kalearekin bat egiten duen gunean, garapen berrian desagertutako aparkaleku-plazen eragina arintzeko.