Hamaika unibertso diferente, kosmosa ikusteko hamaika modu. Ziudadelako lubanarroetako tapiz berdearen gainean paratu dituzte hamaika lan horiek beste hainbeste ikastetxek (DBH, Batxilergo eta Lanbide Heziketakoak), udal hauetako berdegune eta lorezaintza zerbitzuen laguntzarekin: Burlata, Noain-Elortzibar, Aranguren, Egues, Berriozar, Orkoien Antsoain eta Iruña. Guztira 1.500 m2 estaltzen dituzte, eta Hiriartearen arte iraungikor eta garaikidearen kontzeptua lotzen dute Iruñeko Udaleko Parke, Lorategi eta Berdeguneetako Zerbitzuan ingurumen-kontzientziazioaren alde egindako lanarekin.
Gaur goizeko ekitaldian izan dira Iruñeko alkate Joseba Asiron, Udalbatzako kideak, beste Udaletako ordezkariak eta ekimenean laguntza eman duten beste entitate batzuk: Planetarioa, Iruñerriko Mankomunitatea eta Emausko Trapuketariak. Proiektuan parte hartu duten ikasleekin batera egin dute ibilbidea Santa Isabelen errabelinera, eta lorategi bakoitza seinaleztatzen dituzten karteletako azalpenak irakurri dituzte, horrela eginez land art obra horien irekiera formala. Gero, lubanarroetara joan dira, eta bertan Iruñeko Parke, Lorategi eta Berdeguneetako Zerbitzuko arduradun Mikel Baztanen azalpen zehatzak jaso dituzte.