Erakundea

Haur Eskolen Erakunde Autonomoko lehendakariaren agurra

Familia agurgarriak:

Haur Eskolen Erakundeko lehendakaria naiz 2025eko irailetik. Gogo handiz iritsi naiz, eta ikastetxe horien ildo pedagokioaren kalitateari egonkortasuna eta segida emateko erronkari heldu nahi diot.

Hiru urtetik beherako haurrendako doako ikastetxe publikoek udal-sare bat osatzen dute, eta aukera bikaina dira haurren ongizaterako eta ikasketarako, baita helduendako ere, eskaintzen baitizkiete hazkuntza eta heziketa familiar ordezkaezinen osagarri diren hezkuntza-aukerak.

Haur-eskolek haur guztiek jaiotzetik beretik dituzten ahalmen apartak sustatzen dituzte haurrengan, kultura propio bat garatzen laguntzen diete bizi diren mundua ikusteko, sentitzeko eta hartan parte hartzeko moduaz bezainbatean. Hain zuzen, horretarako baliatzen dituzte etengabeko prestakuntza jasotzen duten profesional tituludunen lana, proposamen pedagogiko zainduak, etengabeko elkarrizketa, esplorazioa eta ikasketa ahalbidetzen duten material egituratu gabeak eta beste ikaskide batzuekiko harremana.

Eraikin berriek edo birmoldatuek gune eta eremu egokiak eskaintzen dituzte eguneko une guztietan jolastu, esploratu, atseden hartu eta ongi sentitzeko, eta une horiek beti dira hezigarriak. Lantegiak, kanpoaldeko jokoak, pixoihala aldatzeko uneak, otordua, loa... horiek guztiek gauzatzen dute hezkuntza-proiektua, eta bereziki zaindu eta etengabe berrikusten dira behaketa-, ikerketa- eta dokumentazio-prozesuen bidez, haurrek haziera arduratsua izan dezaten alderdi guztiei dagokienez, guztiak estuki loturik baitaude.

Jantoki-zerbitzua duten eskoletan sukaldariek eta nutrizionistek batera prestatzen dituzte menu jasangarri eta osasungarriak, gertuko eta garaian garaiko produktu fresko eta ekologikoak erabiliz.

Abentura handi honen parte izanen zareten guztioi, eskerrik asko lotura eta une berezi eta apartekoez betetako bidaia honetan zuen bidelagun izan gaitezen uzteagatik, begiradak, isiluneak, entzuketak, jolasak, sorpresak, harridurak eta ikaskuntzak dituen bidaia honetan.

Aitziber Campión Gamboa

Iruñeko Udaleko Haur Eskolen Erakunde Autonomoko lehendakaria